MNF Party in Chief Minister chu a thusawi-ah mipuite hnena ngaihdam dil tura an phut thu an sawi
MNF President Zoramthanga hian nimin khan Aizawl-a Mizo Hnam Run-ah thuthar thehdarhtute kawmin July 31, 2026-a Govt. Mizoram Law College zirlaite hmaa Chief Minister, Lalduhoma’n thu a sawi ah Mizoram leh Mizo hnam himna khawih thil, thu dik lo hmanga thalai rilru thianghlimte hruai kawi tumna leh hnam pawikhawihna thuk tak a awm nia sawiin, MNF chuan pawi an tih thu a sawi a. “Mizoten inhumhimna kan neih te huai taka tantu leh venghimtu tur anih laia a sawi derthawngtu-a a tang fo mai hi thil pawi em em, State khat hotulu ber tan chuan tih hauh loh turah kan ngai a ni,” a ti.
MNF President chuan British hunlai atanga inhumhimna kan lo neih, ILP leh a lo pianna, BEFR 1873 chu harsatna chi hrang hrang kara Mizo mipuiten kan la venhim chhoh zel nia sawiin, “Hei hi Mizote chimrala kan awm lohna tura min duansak a ni. Central sawrkar, Mizoram sawrkar leh MNF ten inremna thuthlung, Memorandum of Settlement (MoS) kan ziah hmang khan 'Mizoram sawrkar rawn lo chuan tih danglam emaw, hlih emaw a ni lovang' tih chiang taka tarlangin, MoS hmang hian Inner Line Regulation kan hman mek chu nemngheh leh zual a lo ni ta a ni,” a ti a. “Hetiang hi thil awmdan dik zawk anih laiin Pu Lalduhoma'n inremna thuthlung thlenga sawi bawrhban a tum mai kha a pawi hle a. Inremna ziah kawngah a hrechiang ber leh a thawh hlawk ber anga inchhal chung siin, Law College zirlaite hmaah khan Peace Accord tia sawi thin, inremna kha 'Memorandum of Agreement' tih leh 'Memorandum of Understanding' tiin vawi hnih lai a sawi a. Inremna thuthlung kha 'Memorandum of Settlement' a ni zawk a, a hming dik tak pawh a hre fuh lo a, chumai ni lovin, inremna thuthlunga Mizoram sawrkar aiawha hming ziaktu, khatih laia Chief Secretary Pu Lalkhama hming pawh a sawi bo der bawk. Pu Lalkhama hian Vawiin thlengin min la dampui a, Pu Lalduhoma'n a hming a sawi bo hlauh mai hi amah pawhin mak a ti hle nghe nghe a ni,” tiin hre reng chunga sawi dik loh luih chu ram hruaitu lu ber tih loh tawp tur niin a sawi.
MNF President Zoramthanga chuan Forest (Conservation) Amendment Act (FCAA) chungchangah Central lamin ‘Hei hi lo pawm rawh u,’ an tih thawm pawh hriat miah lohvin a ruk thei ang berin Assembly a pass tura puanhnuai-a pass a nih thu leh Remna thuthlung tibawrhbang zawngin kan rorelna sang ber hmun chu an hmang sual tawh nia sawiin, “Tunah hian kan ram, kan hnam leh kan Sakhaw himna sadai chu tuma nawrna leh central sawrkar lam atanga thiah emaw, tih danglam emaw tumna a awm tih pawh tuman sawi a ni lo chunga a humhim tur ber Chief Minister in mahni in humhimna ber a sawi derthawng ta fo hi hriatthiam theih a ni lo a. He kan Inner Line Regulation hi a humhim ngam dawn lo anih chuan Vawiin-a a dinhmun hi bansan mai se tih hi Zoram mipuite duhdan leh keini MNF Party mipuite duhdan a ni,” a ti.
Chief Minister thusawi hi hnam pawi-khawihna leh hnam himna tiderthawngtu a nih avangin mipuite hnenah ngaihdam dil ngei tur leh August 15, 2026 hmaa sut ngei tura an phut thu pawh MNF President chuan sawiin, “Mizo mipuite hnena ngaihdam dila a thusawi hi a sut lo anih chuan a tul anga hmalak chhunzawm zel kan tum a, kan remna thuthlung hi MNF chuan vawnhim reng kan tum a, a ti-bawrhbang tur leh kan himna tichhe zawnga chetna reng reng chu a tawp thlengin kan do tlat dawn a ni,” a ti bawk.