Mizoram State Human Rights Commission (MSHRC) din chungchang Assembly House-ah sawilan a ni

Home Minister K. Sapdanga chuan Mizoram State Human Rights Commission (MSHRC) chu loh theih loh avanga din a nih thu sawiin, Chief Minister Lalduhoma pawhin MSHRC din chu an phur lem loh thu a sawi a. He Commission hian thatna leh that lohna lai a neih theih thu a sawi bawk.

Nimin-a Mizoram Legislative Assembly thutkhawm zawhna leh chhanna hunah Member te zawhna leh zawhbelhna dangte chhangin Home Minister K. Sapdanga chuan State Human Rights Commission chu ZPM sawrkar pian hma atanga din tura tih a nih tawh thu sawiin, “A buatsaih chhung a rei a, harsatna chi hrang hrang a awm thin. Chuvangin, kan inbuatsaih chak hleithei lo,” a ti a. MSHRC Chairman tur pawh kan State-ah a qualify kan nei mai lo tih sawiin, “State danga mite Mizo mipuite rights humhalh tura an lo kal a thiang lo hauh lo. Mahse, kan sawrkar hotute'n uluk taka ngaihtuahin tlema nghah tha deuhin an hria,” a ti a, hei vang hian an pawhtlai thu a sawi a. Gauhati High Court Chief Justice pawh Mizoram dinhmun an sawipui thu sawiin, “MSHRC tha taka din kan duh si, tha taka function turin tualchhung mi ngei kan duh ve deuh tihte leh chi hrang hrangin kan sawiho thin. Chu chuan hun a duh khawp mai,”a ti.

Home Minister chuan 'loh theih loh avanga din' tih chu thudik lo a nih hauh loh thu sawiin, “Din hi sawrkarin emaw, Apex Court-in rawn ti lo se, tu sawrkar mah hian din tul kan ti hranpa lem lo tih hi chu zep thu a cheng lo,” tiin Mizote phei chuan khawtlang sualna veng turin NGO kan neih that thu a sawi a. Thuneitu sang lamin 'din rawh u' tilui tlat lo se chuan sawrkar hmasate angin an din bik kher loh tur thu sawiin, “Tunah lo theih lohna vanga kan din tih hi chu tumahin kan pha thei lo. Advertisment hmasaah chuan Chairman tur leh member daih pawh kan hmu lo,” a ti bawk.

State Human Right Commission chungchang sawi a nih lai hian Leader of Opposition Lalchhandama Ralte leh INC Member C. Ngunlianchunga te rawn dingchhuakin MSHRC chungchanga Chief Minister thusawi Media a lang chungchang an rawn sawichhuak a. Hei hi Chief Minister Lalduhoma chuan sawifiahin MSHRC din chu an phur lem loh thu a sawi a. Human Rights Commission chuan thatna lai leh that lohna lai a neih theih thu sawiin, “Mimal rights humhimna atan a tha em em. Chutihrualin, khawtlang thenfaina kawnga hna an thawhna dal theitu nia an hriat avangin India ramah hian phur takin an din lem lo hlawm,” a ti a. Mizoram-ah pawh sawrkar hmasa hunah din tura tih daih tawh a nih thu sawiin, “An phur lem lo niin ka ring. Reminder tam tak a awm chungin kan nei lo reng,” tiin central atangin pressure a nat tual tual avangin din loh theih a nih tak loh thu a sawi bawk.

Chief Minister chuan Mizo chuan Customary Law-te neiin Lal leh Upa te'n min kaihhruai lai atanga Vawiin thlengin NGO leh khawtlang hruaitute kan nei tih a sawi a, “Mahni khawtlang kan thenfai ve duh thin. He kan lo inenkawl ve thinna Social sanction hi a chak em em a ni,” a ti a. Tunhnaia thil thleng thenkhat te pawh sawichhuakin, A ni lo zawnga lo hmang te'n khawtlang thenfaina ah lo zualko pui ta sela, chet hleitheih a ni dawn lo tih a sawi a, “A leha lingin misualte humhimna ah a chang thei ang tih hlauhthawnna ka nei a, ka pha lo,” tiin dik taka hman a nih an beisei thu a sawi bawk.

Leader of Opposition Lalchhandama Ralte chuan Chief Minister chu hlauh ngah lutuk ah puhin, “Mipuite a ni lo zawnga min hruai ka hlau. Human Rights Commission hi a pawimawh a, kan din ang a, tangkai takin kan hmang ang, kan Society nen inhne rem takin kan hmang ang ti mai se,” a ti a. INC Member C. Ngun-lianchunga pawhin, “A hlauhawm zawng leh intih thaih zawnga engemaw hleka 'ta sela 'ta sela' tih hi a tha ka ti lo,” a ti bawk.