Mizoram in a hranpa-a Finance Commission a neih hnuah an ruahman anga sum dawn thin a nih thu CM-in a sawi
Chief Minister Lalduhoma hian nimin khan Siaha-a DC Office Complex-ah District Pisapui Building thar hawngin hemi puala Inkhawm neih ah Mizoram in a hranpa-a Finance Commission a neih hnuah State sawrkar bakah ADC-te leh Local Bodies hrang hrangte sum dawn tur chu an ruahmanna angin an kal thin thu leh an ruahman dan bakin kal theih a ni lo tih sawiin, tuna MADC-te sum indaihlohna chu pawi a tih thu a sawi a, an harsatna zualpui phurh ruksak nan One Time Grant pek an tum thu sawiin, District leh a mipuite hmasawnna turin nasa taka tanlak a pawimawh thu a sawi a, MADC-ah sawrkar chak leh nghet a awm theihna turin Mizoram sawrkar ruahmanna siamte tha taka thawhpui turin a chah bawk.
Chief Minister chuan Mizoram sawrkar chuan thang that lak a tum ringawt lo tih pawh sawiin, ram hmasawnna leh rohlu a ngaih pawimawh thu leh hmalaknate tha taka thawk zel turin Department tin a chah a. Chung hnate chu tha taka thawh a nih theih nan khaw tina tlawmngai pawl leh VC-te chu enzui kawnga thawhpui turin a sawm a. Siaha DC Office building thar mawi tak puitlin thei tura tha thawhtute zawng zawng chungah lawmthu sawiin, DC Office Building thar hawn chu Siaha District tan mai ni lo, Mizoram tan pawh hmasawnna chhinchhiah tlak tak a nih thu a sawi a. Hmun tha laili a DC Office a din theih nana zangnadawmna beisei hauh lova, mahni In leh lo sawrkar hnena pe tute chungah lawmthu a sawi bawk.
Chief Minister chuan Siaha District tihchangtlunna turin Mizoram sawrkarin hmasawnna hna nasa takin a thawk mek tih pawh sawiin, Government Quarters (General Pool) - Addl. DC Quarters chhung leh pawn-a sak mek te, Govt. Quarters (General Pool) - Addl. DC Quarters (Type-III) sak mek te, Meisavaih Site-I a Govt. Quarters (General Pool) (Type-III Quarters, 4 Units) sak mek te, Meisavaih Site-II a Govt. Quarters (General Pool) (Type-III Quarters, 4 Units) sak mek te, Siaha-a Circuit House sak mek bakah Tipa-a SDO(C) Office leh Quarters sak mek te a tarlang a. Sawrkar laipui scheme hrang hranga District chhunga hna thawh mek thenkhatte pawh tarlangin, Siaha District-ah khualzinte hip thei Tourist destination hmun tha tak awmin chung hmunhmate tihchangtlunna turin ruahmanna siam a nih thu leh KMMTTP Road to Castle of Beino kawng siamna tur atan cheng nuai 1326 leh Palak Dil kawng siamna tur atan cheng nuai 2161 dah tawh a nih thu a sawi bawk.
Siaha DC Office Building thar hawnna hunah hian Bawrhsap V.L. Hruaizela Khiangte chuan District Headquarters hlun ber pawl kum engemaw chen phuahchawp taka an lo khawsak tawh hnuah building tha tak an luah thei ta chu lawmawm a tih thu sawiin, District dangte ke pen ruala an pen ve theih tawh tur thu a sawi a. DC Office building thar chuan a thawktute chu mipui leh ram rawngbawlna kawngah phurna nasa tak a pe dawn tih a sawi bawk.
Siaha DC Office Building thar hi NEDP atanga sak niin Work Order amount chu Rs. 5,09,08,023/- a ni a, October 31, 2018 khan sak tan niin December 1, 2025 khan zawhfel a ni a. Ground Floor-ah room 17 leh First Floor-ah room 12 awmin a vaiin room 29 a awm a ni.
A hawnna inkhawm hi Addl. DC Abraham Beirazi Khithie chuan kaihruaiin ECM ES i/c Education Rev. Chhuakhu Khithie chuan hunserh a hmang a. Er. Hrangthanga Zote, Chief Engineer (B&OE) chuan Technical report a pe a. He hunah hian Palak bialtu MLA, K. Hrahmo leh leh sawrkar hotu dangte an tel a ni.