Mizo Peace accord chungchang Debate-ah sawm

Chief Minister Lalduhoma chuan ‘Mizo Peace Accord’ chungchang ah MNF chu debate puiah a sawm.

Nimin-a Assembly thutkhawm a zawhna leh chhanna hun hman zawh a nih hnuah MNF Member Dr. R. Lalthangliana chuan Calling Attention Motion’ pulutin, Law Department changtu Chief Minister Lalduhoma'n tunhnaia Govt. Mizoram Law College-a thu a sawina ah kum 1986-a Memorandum of Settlement sign chu Mizoram leh India inremna ni lovin Mizorama party pakhat leh Home Ministry inremna a ni a, a ropui tehchiam lo tia a sawi chuan Mizote inkarah inhnialna a siam a, hei hi reh tawh se a tih thu a sawi a. Hei bakah hian ILP leh Article 371G hnuaia Mizoram Special Provision te chu Central sawrkarin duh hun hunah a lak bo theih thu leh inhumhimna atana rintlak loh anga a sawi chuan Mizorama political party hrang hrangte, mithiamte leh mipui nawlpui a thawng hle tih a sawi bawk a. Inremna chungchang chu Mizo fa zawng zawngte tana thil pawimawh a ni a, tawngkam pawh an hman fimkhur a tul a, State hotu lu berin Statement ang tluka thil engemaw a sawi thin chu ngaihtuah chian a ngai a, Memorandum of Settlement chu sawihnawm tawh loh nise a duh thu a sawi bawk a ni.

He Motion chungchang hi Speaker sawmna angin House Leader Lalduhoma chuan sawifiahin, House-ah thu dik sawichhuahna hun remchang a nei chu lawmawm a tih thu a sawi a. Hemi chungchang hi an sawi fo dawn a nih chuan Mizoram mipuite chuan thudik an hriat theih nan MNF chu an party atangin an duh ber thlang chhuak se, amah nena debate neih a inpeih thu a sawi a, MNF President Zoramthanga leh Laldenga fanu Dr. Rinzuali te pawhin ‘MNF leh India inremna’ tia an sawi an huat loh laia ama sawi an haw ta bik chu a hriatthiam loh thu a sawi bawk a. Khatih hunlaia Mizoram mipui aiawh MP a nihna angin mipui rawn a rawt chu Laldenga chuan mipui rawn a tul lo a tih avangin inremna sign-ah hian mipui an tel lova, enge an sign tur pawh an hre lo tih a sawi bawk.

Chief Minister chuan Mizoram in remna a neih hmaa Mizoram-a Central Act lo awm tawh sa chu Article 371G chuan a huap lo tih pawh sawiin, Inner Line Regulation (ILR) chu Article 371G avanga lo awm thar thut a ni lova, kum 153 liamtaa Mizoram in a neih daih tawh a nih thu leh District Council atanga State thlengin hman a nih thu a sawi a. MNF party hruaituten ‘ILP chu Mizoram sawrkar remtihna lo chuan thiah theih a ni lo’ tih mipui hmaa an sawi thin chuan mipui rilru a hruai kawi avangin a duh lo tih pawh sawiin, Central sawrkar chuan ILP thiat tur hian Mizoram sawrkar remtihna ni lovin, rawn hmasak chauh tur thu a sawi mai thu leh sawi dal emaw, sawi tak emaw lovin, a ziak ang taka sawi mai tur tih a sawi bawk a ni.