Minister Prof. Lalnilawma chawimawi
Nizan hmasa khan Thingsulthliah Camp Area Branch YMA hian an Branch huamchhung a Zirlai titha te lawmpuina leh mi chhuanawm te chawimawina hun buatsaihin he hunah hian Tawi Bialtu MLA leh Minister Prof.Lalnilawma hi Thing-sulthliah khaw tana hna a thawhthat avangin an chawimawi a. Hemi rual hian Exice & Narcotics Department Kolasib a thawk lai H. Laldingliani d/o H. Lalthanga (L) chu hnathawk tha chawimawina, Governor's Gold Medal a dawn avanga chawimawina hlanin HSLC Pass thar mi 13, HSSLC pass thar mi 9, BA passs thar 3, B.Com, B.Sc, BBA, MA, M.Sc leh NEET zo thar mi pakhat theuh te hnenah chawi-mawina an hlan bawk a ni.
Nizan hmasa a he hun hman ah hian Minister Prof. Lalnilawma chuan kum 2023 MLA Election Campaign laiin Candidate tin te’n Bial chhung tan theihtawp an chhuah tur thu te leh hma an lakna tur atan a an ruahmanna te an aupui thu sawiin, “Pathian leh Mipui zarah kan han tling hlauh mai a, chumi hnuah Pathian malsawmna dawngin Chief Minister leh Party hruaitute duhsakna dawngin Minister te kan han ni ta a, Bial chhung khaw tin tan mai bakah Mizoram hmasawnna atan hnathawkin, theihtawp kan chhuah a, kan hnathawh leh kan theihtawp chhuahna te Camp Area Branch YMA te’n min hmuhpui a, min hriatpui hi ka lawm takzet a, Mizoram tan leh ka Bial chhung khaw tin tan theihtawp ka chhuah zel dawn a ni,” a ti.
Minister Prof.Lalnilawma chuan YMA pawimawh zia pawh sawiin, “Mizoram-ah hian YMA hi awm lo tura sungtuah ngam chi pawh a ni lo. YMA hi kan chhiat lai ber pawha min tuamhlawmtu leh min tanpuitu a ni a, kan khawtlang nun siamthatna kawngah hrang hrang ah theihtawp chhuah tlat thin tu a ni,” a ti a. Zirlai chawimawi te leh YMA member te fuihna thu sawiin, an thil tih apiangah theihtawp chhuah a tul zia te, taimakna leh tumruhna te hi hlawhtlinna bul a nih zia a sawi bawk a ni. Nizan hmasa a Thingsulthliah Camp Area Branch YMA Hall-a he hun hman hi Camp Area Branch YMA President,.R.Malsawmtluanga chuan a kaihruai a ni.