MCU-in LPG hmangtute E-KYC ti turin an hrilh

Mizoram Consumer Union (MCU) chuan eirawngbawlna Gas connection nei zawng zawngte chu tun thla ni 16 hmaa e-KYC ti vek turin a hrilh a, huntiam ralhmaa tifel lo te chuan a man tlawmin Gas an la thei tawh dawn lo tih an sawi.

Hemi chungchangah hian thuchhuah siamin MCU chuan sawrkar laipui leh Indian Oil Corporation Ltd. thuchhuak angin LPG Connection nei zawng zawng (PMUY leh NPMUY), E-KYC la ti lo te chuan tun thla, August ni 16 hma a tih vek tur a ni tih sawiin, IOCL-in thupek a chhuah angin Distributor ten Special Camp buatsaihin, Veng/khaw tin-ah an consumer zinga e-KYC la ti lo chu a thlawnin huntiam chhungin tih sak ngei turin an ngen tih an tarlang a. IndianOil One Apps hmanga mahnia ti thiamte chuan e-KYC hi a tih theih bawk tih tarlangin MCU chuan, huntiam a ral hnuah chuan Gas hi Domestic rate (a man tlawm-in) a lak theih tawh dawn loh avangin Veng tina Village Council leh Local Council leh MCU Branch te chu Distributor te lo bepawp a, hmalakpui turin an ngen a; harsatna nei chuan Whatsapp kaltlangin MCU Hqrs. leh District Consumer Union hnenah thlen theih a nih thu an tarlang bawk.

MCU General Secretary H. Lalbiakpuia chuan Akashvani News Aizawl zawhna chhangin, Mizoram-a Gas Distributor ten e-KYC hi an Customer te an tihsak ngei ngei a ngaih thu a sawi a, Distributor ten huntiam ralhmaa an customer te e-KYC an tihsak theih nan MCU chuan pui turin hma an la ta tih a sawi a; e-KYC ti lo tan Gas bur khat hi Rs. 3,000 chuanga lei angai tawh dawn niin a sawi bawk a ni.

Serchhip-ah pawh MIZOFED ten e-KYC hi kalpui mekin Serchhip-a an Office-ah tih theih a nih bakah Veng hrang hranga Gas Home Delivery kalpuitute pawhin an huamchhungah hei hi an kalpui mek bawk a ni.