Lunglei District-a hman tur Mobile Medical Unit tlangzarh

Lunglei District in TATA AIG General Insurance Company Ltd. te Corporate Social Responsibility (CSR) Healthcare Theme hnuaia Mobile Medical Unit (MMU) lirthei an dawn chu nimin khan Health Minister Lalrinpuii chuan tlangzarhin tangkai taka hman turin a vailiam nghal.
Hemi puala Civil Hospital Lunglei Auditorium-a hun hman ah Health Minister Lalrinpuii chuan Lunglei District tana MMU thar tlangzarh theih a ni ta chu lawmawm a tih thu leh Lunglei District mipuite leh thingtlang kilkhawr zawka mite tan thil lawmawm tak a nih thu a sawi a. MMU ruahman saktu TATA AIG leh an thawhpui Swasti-The Health Catalyst te chungah leh a taka kalpuitu tur MFM te chungah lawmthu a sawi a. MMU Vehicle pakhat bakah hian Tlabung Block-a Lawng-a kal ngai ah MMU Boat pek belh tura Minister-in a dilna chu TATA AIG leh Swasti lam hotute chuan remtihsakin, Minister hian MMU Vehicle leh Boat chu tangkai taka hman atan a vailiam nghal a. MMU tana thawktu panga – Supporting Staff pali leh Driver ruahman sa bakah Laboratory Technician pakhat dah belh tura a dilna pawh an pawmsak nghal bawk.

Lunglei District tana ruahman MMU hi Tata Yodha Pick Up niin a lirthei hi cheng nuai 12 man a ni a. Damlo enna khawl famkim nena thuam niin X–Ray leh Test-na chi hrang hrang bungrua cheng nuai 26 chuang hmanga thuam a ni a. A enkawltu tur thawktute rawihna pawh kengtelin Mobile Medical Unit hi Lunglei District-a Doctor leh damdawi In awm remchan lohna khaw hrang hrang tlawhkual tur niin Doctor, Nurse leh Medical staff-te nen heng khaw hrang hrang an fankual thin dawn bakah sawrkar laipui hnuaia Social Protection leh Health Insurance Scheme hrang hrang inzirtirna te buatsaih thin a ni bawk ang.