Loan hmu 483 an awm tawh

Chief Minister Lalduhoma chuan Bana Kaih Scheme hnuaia Progress Partner Loan hmu tawh chu mi 483 an nih thu a sawi. Mizoram Legislative Assembly thutkhawmah ziaka zawhna chhangin Chief Minister Lalduhoma chuan Bana Kaih hnuaiah kumin March ni 1 atanga August ni 18 thleng Progress Partner 742 thlanchhuah zingah Loan hmu tawh mi 483 an awm thu a sawi a, CM Special Package chu mi 396 hnenah pek a ni tih a sawi bawk. Chief Minister chuan Bana Kaih hnuaia tanpuina chu Scheme hrang hrangah Department kaltlanga pekchhuah a nih thu sawiin, Progress Partner sum dawn zat leh Trade an dawnna chu chhinchhiah fel vek a nih thu a sawi a. Bana Kaih hnuaiah hian sawrkar kum kal mekah cheng vbc. 350 dah a ni a, Line Department 21 awmin pawn lam atanga Pawisa hmuhna a awm hranpa loh avangin Handholding Convergence atangin NABARD leh Central Scheme ham-thatna kentel te dawn zel a ni tih a sawi bawk.