Kawngpui siamthat ah chak zawka hmalak a nih loh chuan Dan angin khawng taka hmalak tum a ni
Nimin khan Serchhip DC Meeting Hall-ah District Bawrhsap, Paul L. khuma hovin Serchhip District paltlangtu kawngpui dinhmun thlirhona neih a ni a, he hunah hian Serchhip Addl. DC, Dorothy Muansangi chuan Serchhip District chhunga National Highway-54 Inspection an neih dan tarlangin, kumin July 15 leh 17 te khan Serchhip District kawngpui National Highway-54 hi a a hmunah tlawhchhuakin a dinhmun enfiah vek a nih thu leh heta an thil hmuh dan te chu District Bawrhsap hnenah thehlutin, hemi hnu hian NHIDCL-a PMU Seling leh Lunglei hnenah thehluh leh a nih thu a sawi a. Heng kawng tha tawk lo leh siamthat ngaite hi Contractor-te hnenah an siamthat dan tur ruahmanna siampui lehin, chuta an hmalak zui dante thlir tura he thutkhawm hi koh a nih thu a sawi a. Inspection an neih tuma kawng dinhmun hrang hrang tarlangin, heng te hi kawng enkawltu NHIDCL bakah Contractor ten a dinhmun tlangpui an tarlang a ni.
He thutkhawm a tarlan a nih danin Serchhip District-a Package-I, Khumtung atanga Baktawng khaw hnuai thleng chu Shivalaya enkawlna hnuaiah awmin kawng khuar hnawh ngai te awm bawk mah se kawng hi a chhe lutuk lo nia tarlan a ni a. KRAM Infracon Pvt. Ltd. te kuta awm mek Package-II, Baktawng khaw hnuai atanga Keitum thleng leh Serchhip leh Chhiahtlang-a by-pass Road-ah te kawng chhia a tam thu tarlan niin lirthei tan pawha tlan harsa leh helna tur awm mumal lo khawpa kawng chhia a awm thu te pawh tarlan a ni a. Package-III Keitum atanga Bungtlang thlengin Bhartia Infra Projects Ltd. te kut-ah awm mekin kawng chhia a awm lem lo nia tarlan a ni bawk a. Contractor te chuan kawng khuar hnawh ngai te hi Fur chhung atan an hnawh mek thu leh Bitumen nena ti tur chuan ruahtui tlak zawk hnuah hmalak a nih tur thu an sawi bawk a ni.
Serchhip District Bawrhsap Paul L. Khuma chuan Serchhip District chhunga National Highway-54 Inspection neih a nih hnuah hmalakna a chak lo hle tih sawiin, chak zawka hmalak a tul thu a sawi a. Kawngpui siamthat hna vil zui kawngah tlawmngai pawl leh thuthar thehdarhtute bakah khawtlang hruaitu leh mipuite tanrual a tul thu sawiin, Kawngpui siamthat hna hi ni 15 chhunga beisei anga an thawk tha lo a nih chuan Dan anga khawng taka hmalak zui a nih tawh tur thu pawh Contractor te, Authority Engineer leh NHIDCL hotute hi a hriattir nghal bawk a ni.