Impact Study Committee on KMMTTP and Railway ten CM hnenah Final Draft Report an thehlut
Mizoram-a Rel lo lut leh Kaladan Multi-Modal Transit Transport Project (KMMTTP) Road in a nghawng turte leh hmalak dan tur lo zirchiang tur hian Mizoram sawrkar chuan MLA, T. Lalhlimpuia kaihhruaina hnuaiah ‘Impact Study Committee on KMMTTP and Railway Link between Bairabi and Sairang’ hi dinin zirchianna uluk taka an neih hnuah nimin khan Chief Minister Lalduhoma hnenah Final Draft Report hi an thehlut a, Chief Minister chuan Impact Study Committee-te chu lawmthu lo hrilhin, thla 12 chhunga report thehlut tura tih in nih laiin thla 10-ah an inpeih theih thu sawiin, “In thawkrim tih a chiang hlein ka hria. Bawhzui ngaite sawrkarin a bawhzuina kawngah Study Team-te thawhpuina hi kan mamawh zui zel dawn a ni,” tiin lawmthu a lo hrilh a, sawrkar an thawhpui zel a tul thu a hrilh bawk.
He hunah hian Study Committee Chairman T. Lalhlimpuia MLA leh Member Secretary Zomuana bakah Member dangte telin an report tlangpui (Situational Analysis and Field Study) an sawiho zui nghal a. Mizoram leh Myanmar border-a insumdawn tawnna kal dan leh kal zel dan tur nia lang te, Mizoram sawrkarin a lo hlawkpui ve theih nana dan anga chhiah lak kalpui dan turte leh Mizoram tharchhuah ram danga hlawk zawka thawnchhuah dan turte an sawi a. Tunah pawh hian Mizoram-a sumdawngte leh lirthei-a eizawng (logistic service) ten an hlawkpui hle a, Mizo sumdawngte hian Zakhai Tawng emaw, Kawl Tawng emaw an hman theih phei chuan tun aiin an hlawkpui lehzual ngei ang, an ti a. Khawtlang himna leh dan zawm kawngah mipuite inzirtir uar a tul hle niin an tarlang bawk. KMMTTP hi kum 2027-a hawn a nih dawn chuan chak taka hmalakna tur a tam hle niin an ngai a. Tuna Zochachhuah leh Salachhuah a sumdawngten an mamawh an sawi tam ber chu Godown a ni a. Zokhawthar lama mite sawi langsar ber chu Indo - Myanmar - Thailand Corridor tihhlawhtlin a ni, an ti bawk.
Mizoram in Rel service a neih hnua a nghawng (impact) an zirnaah ILP tha taka kenkawh a tul thu an tarlang a. Mizoram chhunga Rel kawngin a paltlang khua ten hlawk zawka Rel an chhawr theih nan Rel Station tinte approach road tha neih a tul an ti bawk a. Sairang leh Aizawl inkar Taxi chuanman to lutuk avanga mi tam takin Rel an chhawr tangkai tawk loh thu pawh an sawi a ni.
Study Committee-te hian Arunachal Pradesh, Nagaland leh West Bengal te an tlawh a. Nagaland an kalna ah phei chuan thla reilote Rel in Mizoram a tlawh hnua Mizoram sawrkar in Impact Study Team din nachang a hria chu entawntlak an tih thu an lo hrilh a ni.