Hmeichhia te tualthihna hriat tur awm thin pawi an ti

MHIP chuan Hmeichhia ten tual thihna leh kutthlak an tawrh hriat tur a awm leh thin chu pawi an tih thu an sawi.

    Nimin-a Aizawl Press Club-a thuthar thehdarhtute an kawmna ah MHIP General Hqrs. hruaitute chuan Hmeichhia ten tual thihna leh kutthlak an tawrh hriattur a awm leh thin chu Mizo hmeichhiate an rilru a na in pawi an ti takzet tih an sawi a. Mualthuam North-a kum 15 mi Ramdinpuii ruang chhar thu ah a taksa ah vihna leh zaina hnuhma a awm nia an hriat thu sawiin, “Pawikhawihtu an awm anih chuan manchhuah a nih thuai a, Dan hnuaiah na taka hrem a nih ngei hi kan duh a ni,” an ti a. Hetiang tualthihna hi thleng tawh lo se an duh thu sawiin, “Hmeichhe chunga diklo taka kutthlak emaw, chetna emaw a awm a nih chuan Mizo hmeichhia te hian kan enliam mai mai dawn lo, a tul angin a tawp thlengin hma kan la zel ang. Mizo hnam hian tha taka hma a sawn a, hnam zahawm leh hmeichhia leh naupangten him tak leh zalen taka nun an hmanna a nih zel theih nan MHIP chuan a theihna kawngah tha thlah lovin a bei zel ang,” an ti bawk.