Higher Education Institution te tana Workshop buatsaih
He Workshop-ah hian Higher and Technical Education (H&TE) Minister Dr. Vanlalthlana chuan Mizoram sawrkar hnuaia zirna In te chu hmun dang ami te nena khaikhinin kum lamah pawh la nau tak ni hlawm mah se theihna an neih that zia a lang tih a sawi a. Zirna In pakhat in danglamna a thlen nasat theih zia sawiin, hmun danga tihdan tha zawk awmte chu entawn turin kalkhawmte chu a fuih bawk a. Sum awm ang ang te a nihna tur ang taka hman a nih chuan hmasawnna nasa tak thlenna khawp a awm thu pawh sawiin, he huna kalkhawmte chu nasa lehzuala tan la tura fuihin ram dangte umpha mai lova, lehpel thei tura inbuatsaih turin a chah a ni.
He hunah hian H&TE Minister Dr. Vanlalthlana hian College/Institution 13-te hnenah Smart Board, Computer, Printer leh an mamawh dangte a hlan nghal a. Heng bungruate hi RUSA 2.0 Preparatory Grants Central Sawrkarin a pek-chhuah thar atanga lei a ni.
Nimin-a Workshop hi chawhma leh chawhnu Session-a then niin Chawhma lamah College leh Institution-a Principal-te nen inkawmhona hun neih a ni. Chawhnu lamah hian Training Session neih niin PM-USHA chungchang te, Financial Matters leh SNA SPARSH Model chungchang te, PM-USHA Portal chungchang te, GeM chung-chang te leh PM-USHA hnuaia Project hrang hrang te an zirho a. He hunah hian H&TE Department changtu Commissioner & Secretary, Dr. Lalrozama IAS pawh telin Mizoram hmun hrang hrang atangin Higher Education Institute-a thawktute an tel a, H&TE Joint Director (QAC) Prof. Benjamin Lalrinsanga’n lawmthu a sawi bawk.