Footballer of the Year-ah LZ Chhangte
Football Players’ Association of India (FPAI) hian Inrinni zan khan Kolkata khawpui-ah ‘Indian Football Awards 2026’ semna hun hi buatsaihin he hunah hian Founding President Bhaichung Bhutia bakah President hlui Renedy Singh leh tuna President ni mek Mehraj Uddin Wadoo bakah Football lama mi langsar tak tak an tel a. Chawimawina ngaihsan hlawh ber Mipa lama 'Indian Player of the Year' chawimawina chu Mizo midfielder, Mohun Bagan player ni mek Lallianzuala Chhangte hnenah hian hlan a ni a, Kum 29-a upa Lallianzuala Chhangte hi India leh leh Mohun Bagan tana player pawimawh ber te zinga a mi a ni chho mek a, tunhnai khan a khelh thinna Mumbai FC chhuahsanin Mohun Bagan a zawm a, India Football thiam hming-thang Bhaichung Bhutia hnen atangin 'Indian Footballer of the Year 2026 chawimawina hi a dawng a ni.
Football Players Association of India (FPAI) huaihawt Indian Football Awards 2026 hi India rama Football-a chawimawina sang ber te zinga ngaih theih, an players puite vote atanga thlan thin chawimawina a ni a, Lallian-zuala Chhangte hian kum 2023-2024 Season khan a lo dawng tawh a ni.
Chief Minister Lalduhoma chuan chawi-mawina dawngtu Lallianzuala Chhangte a lawmpui thu Social Media kaltlangin a sawi a, Mizoram Football Association (MFA) pawhin Mizo tlangval hnena chawimawina hlan a ni chu lawmawm an tih thu sawiin, kum 2015 – 2016 khan Jeje Lalpekhlua pawhin a lo dawng tawh tih an sawi a, Mizo infiammi lo awm zel tur tana entawntlak an nei chu lawmawm an tih thu an sawi a ni.
Tun tuma chawimawina semchhuah ah hian Hmeichhe lamah Manisha Kalyan chuan 'Indian Women's Player of the Year' chawimawina a dawng bawk a, kum 2025-26 Season-a hlawh-tlinna chang East Bengal Team hnenah pawh chawimawina hlan niin East Bengal mipa Team hian kum 22 chhung National League Title an lo nghah tawh chu titawpin 'ISL Champion' an ni a, East Bengal FC Women Team chuan 'IWL Champions' lawmman an dawng bawk a ni.
Shillong Lajong FC player Phrangki Buam chu 'I-League Player of the Year' chawimawina hlan niin Jamshedpur FC player Sanan Mohammed K chu 'Young Player of the Year' atan thlan a ni bawk a, Miguel Figueira Damasceno chu 'Foreign Player of the Year' atana thlan a ni a, Owen Coyle chuan mipa lama 'Coach of the Year' chawimawina a dawng a, Anthony Andrews chuan Hmeichhe lamah 'Coach of the Year' chawi-mawina a dawng ve bawk a ni.
Sanfida Nongrum chu 'Women's Young Player of the Year' atana thlan a ni a, Coach hlun Savio Medeira chuan 'Coach Education Award' a dawng a. Rapid Sports leh The Right Weigh te chuan 'Player Performance and Development Award' an dawng bawk a ni.