East Lungdar VC by-election ah ZPM Candidate a tling
State Election Commission (SEC) ruahman angin East Lungdar Village Council-a Seat ruak pakhat hnawhkhat tura by-election chu nimin khan tluang taka neih a ni a, ruahman lawk angin zing dar 7:00 atangin Vote nei te tan Vote thlakna hun hawn a ni a, nileng-a Vote thlak awm deuh rengin tlai dar 5:00-ah Vote thlak hi zawhfel a ni a. Vote nei mipa 1112 leh hmeichhia 1248, an vai-a 2360 zingah mipa 787 leh Hmeichhia 853, an vaiin mi 1640 ten Vote an thlak a, Vote za zela 69.5 a tla a ni.
Vote thlak zawhfel a nih hnu nizan dar 7:00 atang khan Vote tla te hi chhiar nghal a ni a, ZPM Candidate F. Lalchawimawia chuan Vote 909 hmuin a khingpui awmchhun INC Candidate Vansangliana chuan Vote 713 hmuin ZPM Candidate hian Vote 196 in a hneh a, NOTA-ah Vote 18 a tla a ni.
Tarlan tawh thin angin East Lungdar Village Council-ah hian Seat 7 awmin Inthlanpui neih hnuhnung berah khan ZPM chuan Seat 4 lain MNF in Seat 2 leh INC in Seat pakhat an la a. ZPM hian Executive Body siamin VC President atana an hman chu kumin khan a boral a. Hei vang hian Seat ruak pakhat awmin hemi hnawhkhat tur hian nimin khan by-election hi neih a ni ta a. Inthlanna nei a nih hnu hian ZPM chuan Seat 4 bawk nei leh ta in MNF in Seat 2 leh INC Seat pakhat an nei leh ta a ni.
Nimin-a East Lungdar Village Council-a by-election neih ah hian boruak muanawm tak hnuaiah mipui ten Vote an thlak a, venhimna pawh uluk taka ruahman niin Serchhip DC Office atangin Asst. District Election Officer leh Addl. DC, Dorothy Muansangi chuan a hmunah tlawhin boruak a thlithlai a. Executive Magistrate Dr. Malsawm-tluanga Fanchun, PD, DRDO Serchhip leh Dr. Marilyn Lalruatkimi, BDO East Lungdar te pawhin a hmunah an vil reng bawk a ni.