Dan Lova Pension/Family Pension lak tihreh nana hmalakdan tur inhrilhhriatna buatsaih a ni
District Treasury Office huaihawta mahni duhthu ngei-a Pension Payment Order hlan let chungchang zirhona, ‘Sensitization on Voluntary Surrender of Pension Payment Order’ hi Sub-Hqrs. YMA Hall, Serchhip-ah neih niin he hun hmanpuitu District Bawrhsap Paul L. Khuma chuan sawrkar in Pension a pekchhuah chhan tlangpui leh a pek dan kalhmang te sawiin, Mizoram-ah mahni duh thu vang ni kher lova Dan dik lova pension la an awm theih thu leh heng te avang hian kumtin sawrkar in sum tam tak a hloh bakah a la tur dik tak ten an lak loh phah theih thu te, eirukna kawng khat a nih theih thute a sawi a. Hetianga dan dik lova Family pension la zinga mi thenkhat chu Dan an hriat loh vang a nih theih avangin he huna kalkhawmte chu mi dangte hrilh chhawng tura tanlak a tul thu a sawi a; sawrkar hnathawk Certificate pechhuak thin te, VC, YMA leh Kohhran hruaitu document (hriatpuina lehkha, baptisma certificate etc.) pechhuak thinte chu dik taka ti thin turin a sawm bawk a ni.
He zirhona hun hi Serchhip Treasury Officer Vanlalhmangaihi chuan kaihruaiin he hun an buatsaih chhan tlangpui sawiin, Sawrkar chuan July ni 1 , 2026 atanga September ni 30, 2026 thlengin dan lova pension la te mahni duh thua pekkir hun (Voluntary Surrender of PPOs) a hawnsak thu leh huntiam chhunga PPO pekir te chu an pension lak tawh zawng zawng ngaidamin, September ni 30 hnulamah chuan District tinah dan lova Pension la te zawngchhuak tur District Level Task Force din a ni dawn thu leh Dan anga hmalak zui a nih tur thu te a sawi bawk a ni.
Nimin-a zirhona ah hian Resource Person atan Accounts & Treasuries-a A&AO, Laldinliana Sailo hman niin Family Pension chung-changa hriat tur pawimawh hrang hrangte sawiin, Family Pension la mek zingah la thei tawh lo an awm ngei nia a lan thu leh hei vang hian mahni duh thu ngeia PPO pekkir hun hi ruahman a nih thu a sawi a. Chief Minister hovin July ni 15, 2026 khan State pum huapa hemi chungchang inhrilhhriatna hun hi hman a lo nih tawh thu leh sawrkarin a ngaih pawimawh em avangin District hrang hrangah pawh Sensitization Prog-ramme hi hman vek tura tura tih anga he hun hi hman a ni.
Tun dinhmunah Serchhip-a District Treasury atang hian Pension la mi 1663 an awm mek a. An zinga a tam ber mi 1051 te chu Superannuation pension la niin Family Pension la mi 418 an awm bawk a. Voluntary pension la mi 169 leh Invalid Pension la mi 19 awmin Compulsory Pension la mi 6 an awm bawk a ni.
CCS (Pension) Rules, 1972-in a tarlan ang chuan, a hnuaia mite hian family pension an la thei tawh lo:
1. Family pension la mekin nupui/pasal a neih leh chuan family pension a la thei tawh lo.
2. Sawrkar hnathawk fa hrin ni lo emaw, dan ang taka fa lak ni lo, birth certificate lem siama family pension la te.
3. Sawrkar hnathawk ni reng si, mahni nu emaw pa emaw fate emaw family pension la te.
4. Pensioner ni reng si, mahni nu emaw pa emaw fate family pension la te.
5. Pasal nei reng chung si, pasal neilo anga in ziah a, nu/pa emaw pasal a sûn tâkte family pension la te.
6. Family pension lâk duh avanga mahni nu leh pate thih ni emaw, pasal te thih ni / inthen ni tidanglama family pension la te.
7. Thla khata pawisa lâkluh zawng zawng belhkhawm a, monthly minimum pension @ Rs. 8700 plus DR income nei pha, tun dinhmunah chuan Rs. 12702 la tling te.