Champion lawmna CM in telpui
Tlangnuam Veng Community Hall-a he hun hman ah hian Tlangnuam Futsal Club te a lawmpui thu sawiin, “Vawi khat Champion-ah hian in duhtawk mai ang tih ka hlau a. Asia khawmualpui huapa inelna, AFC Asian Futsal Cup a la awm a, chumi chungah chuan khawvel huapa FIFA hnuaia inelna Futsal World Cup te a la awm zel a. Heng inelna sang zawk hi in thlir phak tur a ni,” a ti a. India Team a tel phak ah te kan lawm tawk ringawt tur a ni lo tih pawh sawiin, “India National Team innghahna, India National Team-te Futsal World Cup thlenpuitu, Champion-pui thei Player nih kan tum zawk tur a ni,” tiin lawmpuina pawisafai a hlan bawk.
Tlangnuam Futsal Club Manager, Lalrinzama chuan he hunah hian Report pein an Club hi kum 2020 a din a ni a, Managing Board neiin an thiltum ber chu an Veng thalaite infiamna lama tihhmasawn leh Mizoram hming titha tura theihtawp chhuah a ni a. AIFF Championship khel tur hian mahni State League-a Champion nih ngaiin MFA Futsal Champion an nih anga tun tuma India huap inelna hi zu khel thei an ni. He Inelna hi Gujarat-ah khelh a ni a, Tlangnuam Futsal Club hian an khelh chhungin chak loh an nei lova, an tumpuite lamah goal 69 an khung a, an lamah hian goal 12 a lut thung a. An keeper-te pahnih tih loh player dang zawngten goal an khung vek a ni.