Bawlhhlawh sawngbawlna kawnga hmalak dan thlirho
Serchhip DC Meeting Hall-a thutkhawm ah hian Bawlhhlawh hman khat daih (Single Use Plastic) tihrem a nih theihna turin Inspection Team hrang hrang ten August thla chhunga an huamchhung theuha endikna an neih dan tarlangin, Single Use Plastic (Polythene etc.) man khawl sate tihral dan turte, dan bawhchhetute hremna chungchangte, thingtlang lama Village Council leh NGO te nen tang tlanga hmalak zel dan turte sawiho a ni bawk.
Tun dinhmunah Solid Waste Management Rules angin bawlhhlawh chi li-a thliar hranna chu New Serchhip North leh South VC Area-ah te kalpui tan a ni tawh a, Village Area-ah khaw pali-Sialsir, Sailulak, Leng leh Baktawng Chhuanthar-ah te August thla atangin kalpui tan a ni tawh bawk. Heng bakah hian Serchhip, Thenzawl leh N. Vanlaiphai-ah te Solid Waste Management Centre sak mek a ni a; Sialsir, Baktawng leh Keitum-ah Community Compost Yard, Vantlang bawlhhlawh (tawih thei) paihna tur hmun siam a ni dawn bawk. A tul dan azirin hmun dangah pawh sak chhoh zel tura ruahman a ni a. Heng bakah hian Serchhip District chhunga Tourist Destination pali- Dilpui Area, Golf Course, Tuirihiau leh Vantawng khawhthla hmunah te Single Use Plastic hman khapna thupek chhuah a ni tawh bawk.
India ramah Supreme Court thupek bawh-zuiin SWM & PWM Rules te khauh taka kenkawh a nih theih nan chak taka hmalak mek zel a ni a; Inspection Team te thla khatah vawi li tal endikna neia fehchhuah thin a ni dawn a. Dan bawhchhetute chungah hremna lekkawh a nih dawn avangin dawr-a thil lei tur (Consumer) te chu mahni bazar bag intodelh theuh tura ngen leh hriattir bakah mahni puala tui bottle neih theuh nise tia inzirtirna uar nise tiin committee chuan a rel bawk a ni.