Bana Kaih Scheme Phase-II hnuaia dilna lut te enfiah hna kalpui zel a ni
Zirtawpni kalta July 31, 2026 khan Mizoram State Project Coordination Committee, Bana Kaih Scheme Implementing Department atanga Nodal Officer-te leh Partner Bank; SBI, MRB, MCAB hotute chu Planning & Programme Implementation Department Committee Room-ah an thukhawm a, he hunah hian Bana Kaih Scheme loan dilna lut 68 leh Chief Minister Special package dilna 1492 te chu endik a ni a, Chief Minister Special package dilna 1492 endik ah hian AH & Veterinary Department atanga dilna tam berin dilna 872 a lut a. Commerce & Industries Department hnuaiah dilna 504 a lut bawk a ni.
He thutkhawm ah hian Bana Kaih Scheme hnuaia dilna hrang hrang endik a nih bakah Postal Department nena thawhho dan turte, Bana Kaih Scheme kalphung tih changtlun lehzualna tura 'Last Mile Connectivty' kalpui dan turte, Implementing department te hnathawhna senso pek dan thlirletnate neih a ni a. Bana Kaih Scheme hnuaia Progress Partner te hmalakna enzuina tur leh mipui hnena scheme kalphung zirtirna leh Documentation & publicity kalpui dan turte enho a ni a. Handholding Mela buatsaih dan tur te, Handholding Scheme Phase III kalpui dan tur bakah, loan pek tura dilna pawm tawh, chhan hrang hrang avanga Bank lamin an la pekchhuah theih loh dilna 29 pawh uluk taka enho a ni bawk.
Mizoram State Project Coordination Committee (MSPCC) Vice Chairman leh Adviser to Chief Minister (Implementation of Handholding Scheme Dr. KC Lalmalsawmzauva chuan he thutkhawm hi kaihruaiin kuthnathawktute kaih chhuahna Scheme, thiamna leh theihna nei mi taima leh tumruh te eizawnna bultanna tur leh ram tih hmasawnna kawnga hmanraw tangkai tak, Bana Kaih Scheme hlawhtlin lehzualna turin dilna rawn lutte chu uluk taka endik a pawi-mawh thu a sawi a. Dilna lut thlitfim hna chu a hun taka kalpui a nih theih nan leh Sawrkar thawhpui theih tur Progress Partner tha thlanchhuah ngei a nih theih nan Implementing Department-a Nodal Officer-te inpekna a pawimawh thu a sawi bawk a ni.