Zirna lama mitdel te hmasawn nan MoU ziah a ni
SAD Conference Hall-a he MoU ziah ah hian Mizoram sawrkar aiawhin SW, W&CD changtu Commissioner & Secretary, Lalzarmawii leh Toyota Kirloskar Motor aiawhin Ramesh Rao, Vice President, External Affairs & CSR ten an hming an ziak a. Tun dinhmunah Mizoram-ah hian khaw hmuh lama harsatna nei mi 2,035 awm mekin an zinga zaa pakhat vel chauhin eizawnna mumal an nei nia hriat a ni a. Nimin-a ziah tak Mizoram sawrkar leh Toyota Kirloskar Motor-te thawhdunna hnuaiah hian a thawh khatna atan Special Blind School, Durtlang hnenah Navinaut Assistive Mobile Device 250, Braille Computer, Printer leh AI Scanner pek a ni dawn a. Thawh khatna dinhmun thlir chungin thawh hnihna-ah Navinaut Assistive Mobile Device hi 930 semchhuah belh leh tura ruahmanna siam a ni bawk a. He khawl hian khaw hmuh lama harsatna neite tan chetvelna bakah zirna leh thil danga mi dang rinchhan lova thil an tih theih nan a pui dawn a ni.
MoU ziahna hun hi Social Welfare, Women & Child Development Department Minister Lalrinpuii chuan telpuiin Mizoram Sawrkar leh Toyota ten thawhdunna thuthlung pawimawh tak an ziak thei chu lawmawm a tih thu a sawi a. Thawhdunna thuthlung chu a lo zik chhuahna tarlangin, amah ngei Bhubaneswar City Knowledge Innovation Cluster (BCKIC) te buatsaih CSR & Sustainability Conclave 2025-a a tel ve tumin Toyota hotute nen inbe chhunzawm a, tun dinhmun hi lo thleng ta an nih thu a sawi bawk. Minister chuan Mizoram chhunga khaw hmuh lama harsatna neite chuan zirna mai bakah eizawnna kawngah harsatna an tawk nasa hle tih tarlangin, chung harsatna te chu theitawpa sutkianpui tura hmalak chu mi tin mawhphurhna a nih thu a sawi a. Hmasawnna huapzo hnuaiah mimal tinin zirna tha an dawn theih nan te, mahni intodelha khawtlang hnena pek let an neih theih nan te Mizoram sawrkar leh Toyota Kirloskar Motor thawhdunna chu rahbi pawimawh tak a nih ngei a beisei tlat tih a sawi bawk.
He hunah hian Toyota Kirloskar Motor, Corporate Affairs-a Country Head & Executive Vice President, Vikram Gulati pawhin mihring chetvelna tih awlsam chu mihring theihna pawchhuak tura pawimawh hmasa ber pakhat a nih thu a sawi a. Tunlai thiamna hmanga mihringte'n mahni inrintawkna nena hna an thawh chuan nghawng thui tak a neih thu sawiin, Mizoram sorkar nena an thawhdunna hnuaiah nitin khawsak tiawlsam turin khawl leh hmanraw changkang tak takte hmang tangkaiin, danglamna thlen dawrh hmasawnna a hrinchhuah a beisei tih a sawi bawk.