VB-G RAM G Training tan a ni

Viksit Bharat – Guarantee for Rozgar and Aajeevika Mission (Gramin) Act, 2025 (VB-G RAM G) kalpui meka State leh District-a Official te tana Training ni hnih chhung awh tur chu nimin khan Durtlang Leitan-a SIRD&PR Conference Hall-ah neih tan a ni a, Vawiin hian chhunzawm a ni ang.

Mizoram sawrkar Rural Development & Administration Department leh NIRD&PR Hyderabad te tangkawp buatsaih he Training hawnna hi RD&AD Minister Prof. Lalnilawma chuan hmanpuiin VB-G RAM G chu MGNREGA hming thlakna leka ngai lova Mizoram hmun kilkhawr berte hmasawnna hmanrua anga ngai turin he Training-a tel turte chu fuihin, ‘recommitment’ (inhlanthar lehna) nen hna thawk turin a fuih a. VB-G RAM G-ah chuan VB (Viksit Bharat) lai chu a pawimawh a tih thu sawiin, Gram Panchayat-te tel lovin Mizoram leh India chuan hma a sawn thei lo tih a sawi a, Chief Minister pawhin a lo sawi tawh thin angin Mizoram in kum 2047-ah chuan India ram GDP ah 1% tal thawh ve a tum pawh Gram Panchayat Level atanga kan thawhho chuan kan tih theih ngei a rin thu a sawi bawk.

Hei bakah hian RD&AD Minister chuan VB-G RAM G hnuaia Priority area hrang hrang - Water Security, Core Rural Infrastructure, leh Livelihood related infrastructure te chu an nihna tak pawk chhuak zo tura hnathawh a nih theih nan training tura kal te chu a sawm a, training tha leh hlawkthlak tak an neih theih nan duhsakna a hlan bawk a ni.

He training-ah hian NIRD&PR atangin Dr. B. Suresh Babu (Associate Professor & Head) leh Dr. GVK Lohidas (Assistant Professor) te an tel a. A hawnna programme hi SIRD&PR Director R. Lalremsanga’n a kaihruai a, Course Coordinator Dr. C. Lalthlansanga chuan report a pe bawk a ni,