UNDRR te nena thawhho theih dan tur sawiho

Disaster Management & Rehabilitation Minister Prof. Lalnilawma chuan niminpiah khan United Nations Secretary-General (SRSG) for Disaster Risk Reduction (UNDRR) Special Representative, Kamal Kishore chu New Delhi-a Mizoram House-ah kawmin Technical thila thawhhona tha zawk an neih theih dan tur an sawidun.

He inkawmna ah hian DM&R Minister chuan khuarel chhiatna hrang hrang - lirnghing, leimin, lung tla, sik leh sa inthlak danglamin a nghawng chhiatna dang te laka Mizoramin harsatna a tawh theih dan a sawipui a. Heng chhiatna lo thleng thut thei laka Mizoram mipuite an inven theih nan khawpui ruahmanna tha zawk siam leh Insak dan chungchangah pawh tunlai thiamna hmanga building sak dan tur kaihhruaina tha zawk siam chungchanga Mizoram hmalakna te; Aizawl khawpui tawt lutuk chung-chang leh Thenzawl Peace City atana ruahmanna an siam dan te a sawi a ni.

National Disaster Management Authority (NDMA) te nen thawkhoa leimin nasa laka himna tur Mizoram Sawrkarin project a siam te, chhiatna a thlen hmaa rang zawka ralkhel dar (warning system) tih rik dan tur te, In sak dan him leh tha zawk te leh mipui inralrin dan tur zirtirna te pawh sawilan a ni a. Heng chhiatna laka Mizoram mipuite himna tura tunlai thiamnaa tanpui an ngaihzia te Prof. Lalnilawma chuan a sawi a ni. 

Special Representative Kamal Kishore chuan Mizoram hmalakna tha a tih thute leh UNDRR chuan thiamna kawnga tanpui tur leh ramdang mi thiam bikte nena Mizoram State thlunzawm dan tur chungchangah an inhawn thu a sawi a. Mizoram in North-East Regional Disaster Management Conclave a thlen tur chungchang pawh an inkawmna ah hian an sawi bawk a. Khawvel sik leh sa danglam zelah khuarel chhiatna nasa zawk thleng thei dolet dan tur leh inbuatsaih lawk dan tur te, chhiatna nasa zawk a thlen lohna tura Sendai Framework for Disaster Risk Reduction inkaihhruaina zawm leh thlawp chungchang te pawh an sawi a ni. DM&R Minister hi Renu Sharma, Adviser to Govt. of Mizoram; Shweta Chauhan IPS, Resident Commissioner, Mizoram House New Delhi; Sushil Singh IAS, Secretary DM&R leh Alexander V. Chongthu, Addl. Resident Commissioner ten an tawiawm a ni.