Mizoram-ah mi 12 ten Family Pension lak mek titawp in sawrkar-ah an thehlut tawh

Mizoram sawrkarin Dan lova Family Pension late'n anmahni duh thua an pension lakte an tihtawpna tura a ruahman mekah nimin thleng khan Aizawl District-ah chuan mi 12 velin an pension lakte an surrender tawh a. Sawrkar chuan kumin September 30 thlengin Dan lova pension la te tana surrender hun hi a hawng a ni.
Accounts & Treasury hotute chuan, Mizoram sawrkar hnuaiah dan ang taka Family Pension la thei tawh lo, Pension Rules-in a huam tel loh leh lak a phal tawh lohte zingah document dik lo hmanga Family Pension la zui mek engemawzat an awm thu sawiin, hetianga Dan phal loha Family Pension latute hi anmahni duhthu ngeia tihtawpna (surrender) hun hawnsak mek an ni tih an sawi a, hriat lohna avang emaw, chhan dang vang emaw a dan dik lova Family Pension la mekte chu tun thla ni 1 atanga September thla tawp thleng in surrender-na hun pek an ni tih an sawi a ni. Aizawl District-a sawrkar hnathawkte Pension enkawltu - Aizawl South Treasury hotute chuan nimin thleng khan Family Pension surrender mi 10 vel an neih tawh thu sawiin, Aizawl North Treasury hotute chuan mi pahnih surrender-na an dawn tawh thu an sawi a, Mizoram-ah hian Aizawl tih loh District dang 10-ah Treasury pakhat theuh awmin, heng Treasury-te hian an huam chin theuha sawrkar hnathawk pension late an enkawl a ni.

Treasury hotute chuan dan phal loha Family Pension lâkin a huamte chu chi 7-ah then an nih thu an sawi a, chu'ngte chu - Family pension la mek nupui/pasal nei leh te; sawrkar hnathawk fa hrin ni lo emaw, dan ang taka fa lak ni lo, Birth Certificate lem siama Family Pension la te; Sawrkar hnathawk ni reng sia mahni nu emaw pa emaw fate emaw family pension la te; Pensioner ni reng si a, mahni nu emaw pa emaw fate Family Pension la te; Pasal nei reng chung si a pasal nei lo anga inziaka nu emaw pa emaw pasal sûn tâkte Family Pension la te; Family Pension lak duh avanga mahni nu leh pa te thih ni emaw, pasal te thih ni/inthen ni ti danglama Family Pension la te; Thla 1-a pawisa lakluh zawng zawng belhkhawma Monthly Minimum Pension Rs. 8,700 + DR income nei pha, tun dinhmunah chuan Rs. 12,702 la tling mekte an ni a. 'Voluntary Surrender of Pension Payment Order' hman mek hi a ral hnuah Task Force hmangin Family Pension late hi an endik dawn thu leh Dan bawhchhia te Dan hmanga hrem an nih tur thu an sawi bawk a ni.