Tunkar chhungin Sawhthing man pek tlak tum
ZPM Party in nimin-a an Party Chhung Inkhawm an neih ah Agriculture Minister PC. Vanlalruata chuan ‘Pu Lalduhoma'n kuthnathawktu ten thlai rate hresa in hna in thawk ang’ a lo tih kha a takin kan tihlawhtling mek tih sawiin, “Kumin chhung hian Support Price kaltlanga Sawhthing hralh zawng zawng hi quintal 2,25,335 a ni a, Support Price kan pekchhuah tawh zawng zawng hi Rs. 37,24,36,279 a ni a, Support Price pekchhuah tur Rs. 13,88,73,216 kan la nei a, tunkar chhung hian pekchhuah kim hman hram kan tum a ni,” a ti a. Secondary Collection Center (SCC) zingah kumin-a Sawhthing hralh tam ber chu Khuangleng SCC niin kg. 15,60,550 an hralh a, Cherhlun SCC-in kg. 7,03,870 leh Keifang SCC-in kg. 6,21,708 hralhin an dawt a. Primary Collection Center (PCC) zinga hralh tam ber Maite PCC-in kg. 3,17,347 hralhin Hliappui PCC-in kg. 2,95,240 leh Cherhlun PCC-in kg. 2,88,880 hralhin an dawt a. Mimal-a Sawhthing hralh tam ber chu Zoremnghaka, New West Phaileng niin kg. 26,462 a hralh a, a dawttu Lalmalsawmi, Champhai Zion Veng in kg. 23,129 hralhin Helen Lalrosiami, Dungtlang chuan kg. 22,046 a hralh bawk a. Mimal Sawhthing hralh tam 10 chin belhkhawm chu kg. 2,18,936 a nih thu pawh Minister chuan a sawi bawk.
Kuthnathawktu ten thlai an hralh that theih lohna chhawktu tur Central scheme pakhat, Market Intervention Scheme (MIS) chu nikum khan Sawhthing avangin kan claim thu Agriculture Minister chuan sawiin, “Mizoram Agriculture Marketing Board (MAMB) account-ah MIS atang hian Rs. 9,48,14,281 a lo lut fel tawh a ni,” a ti a. Kumin-ah sawrkar rate aia sangin Sawhthing thahnem tak hralh a nih thu leh sawrkarin Sawhthing a leina figure pawh a tlahniam viau tih a sawi bawk.
Sawhthing-ah tan an lak nasat thu pawh Agriculture Minister chuan sawiin, “Kan Chief Minister-in nasa taka hma lain NITI Ayog kaltlangin DONER-in Sawhthing sawngbawlna tur min pe tawh a ni. A bul tanna atan Champhai District hmun pali-ah ruahmanna kalpui mek a ni a, a hmunpui ber tur hi Mualkawi-ah dah a ni ang a; Vaphai, Tualcheng leh Zotlang-ah Unit te zawkte pawh dah tum a ni. Tunah hian DoNER atangin cheng vbc. 30.13 dawn tawh a ni a, E-Tender hmangin a thawktu tur pawh thlan fel tawh a ni. DONER-in min buaipui mai piahlamah hian Tuirial leh Khamrang-ah MAMB hmalaknain Sawhthing sawngbawlna hi din tuma hmalak mek a ni bawk,” a ti bawk.