Nimin zing dar 2:00 vel khan Kolasib Venglai East, Silchar Road-ah Aizawl lam pana tlan Wagon R (AS-10/G-1931) chuan kawngsir-a Aizawl lam hawia ding Truck (MZ-01/T-8293) chu su in Truck hi hnung lamah tawlh zuiin metre 50 vela thui an tawlh hnuah a tlu a, Truck tlu hian Car hi delhin mi pathum te chu a hmunah an thi a, midang pahnih chuan hliam an tuar bawk. Vanduaina thlenga thi te hi Masukur Rahman (26), Sadam Hussain (28) leh Abu Khaled MD Imdadulla (19) te niin Ghulchara, Karimganj District, Assam vek an ni a, hliam tuar te hi Ruhul Islam, Ghulchara leh Saharul Islam Talukdar, Chandipur, Hailakandi District te an ni a, Kolasb District Hospital-a hruai niin First Aid pek an nih hnuin chhuah tir lehnghal an ni.
Thudawn danin, Car-in truck a sut lai hian Truck-ah hian handyman chiah chuangin a muhil a, thil ri bur hriain Truck hi a lir zui nghal a, a brake rap mah se a ding thei lo a. Truck hian eitur bakah leitha (fertilizers) bag 80 vel a phur a ni.
