Mizoram Cooperative Apex Bank Ltd. chuan Aizawl Traffic Police te hnathawh an ngaihhlut zia lantir nan nimin khan Traffic Sleeveless Jacket (Vest) 320 an hlan a, a vai hian Rs. 4,48,000/- man a ni. Heng Vest te hi Apex Bank Head Office Conference Room-ah MCAB Chairman, Lalnunsanga chuan Aizawl Traffic SP, C. Vanlalvena hnenah a hlan a, Aizawl Traffic SP chuan Aizawl Traffic Police tana Mizoram Cooperative Apex Bank Ltd. inpekna chu lawmawm an tih thu sawiin, Aizawl Traffic Police-te hnathawhna atan a thil tangkai tak leh Traffic Discipline vawnna kawngah pawh hmanraw tangkai tak a nih tur thu a sawi bawk. He hunah hian kumin January thla atanga June thla chhungin lirthei dan bawhchhia 5,388 zet an awm tawh thu leh an pawisa chawi tlingkhawm pawh Rs. 60,99,300/- a tlin tawh thu tarlan a ni.
