Serchhip Town Sanitation Task Force thutkhawm nei
Serchhip DC Meeting Hall-a thutkhawm hi an Chairman leh Bawrhsap, Paul L. Khuma chuan kaihruaiin New Serchhip VC area chhunga bawlhhlawh te chi hrang hrang pali– Tawih thei, Tawih thei lo, Sanitary (diaper, pad etc.) leh Special Care (e-waste, chemical, damdawi chhia etc.) a thliarhranna '4-Way Segregation' kalpui dan tur te, Serchhip Town Area dangah '2-Way Segregation' (Tawih thei leh Tawih thei lo) a thliarhranna kalpui dan tur chungchang te, Chhiahtlang North leh South VC area-a Urban area anga Green Herd SP-te nena bawlhhlawh sawngbawl dan tur leh hmalak zui dan tur chungchangte sawiho a ni a. Heng bakah hian Serchhip, Thenzawl leh N. Vanlaiphai-a bawlhhlawh sawngbawlna hmunpui – Solid Waste Management Centre (SWMC) leh Solid Waste Segregation Centre (SWSC) sak hna thawh mekte dinhmun leh hmachhawpte sawiho niin SWM Action Plan hnuaia Department hrang hrangte chanvo leh an hmalakna te thlirho a ni bawk.
He thutkhawmah hian Serchhip-a SWMC sak hna thawktu, Lushai Corner, Luangmual, Aizawl te; Thenzawl-a SWSC sak hna thawktu Studio One Architect, Khatla, Aizawl leh N. Vanlaiphai a SWSC sak hna thawktu UD&PA Department aiawhte telin an hmalakna te ngaihthlak a ni a, Serchhip-a SWMC hi kumin December emaw, nakum January emaw chhunga zawhfel vek hman tum niin SWSC te pawh inkalpawhna kawng tih loh chu zawhfel thawkhat a nih thu tarlan a ni.
Bawrhsap Paul L. Khuma chuan Supreme Court thuchhuak angin SWMC/SWSC te hi hman theih a nih veleh District pumah '4-Way Segregation' chu chak lehzuala kalpui zel tur a nih thu he hunah hian sawiin, hna te tha taka hlenchhuah a nih theih nan khawtlang hruaitu, mipuite leh sawrkar Department te tanrual a pawimawh thu a sawi bawk.