Tourism Minister in Union Tourism Secretary a kawm

New Delhi-a cham mek Tourism Minister Lalnghinglova Hmar chuan nimin khan Ministry of Tourism-a Secretary Bhuvnesh Kumar IAS chu kawmin Mizoram-a Tourism Project kalpui mek te leh Project hmachhawp hrang hrangte an sawidun.

Transport Bhawan, New Delhi-a Secretary Office-a an inkawmna ah hian Tourism Minister Lalnghinglova Hmar chuan tourism hmasawnnaa Mizoram sawrkar hmalaknaah Ministry of Tourism puihna leh duhsakna chu lawmawm a tih thu a sawi a. Ramchhung leh pawn atanga tlawhtu pung zelah Mizoram in khualzin thahnem zawk a hip theihna tura theihna a neihte tihpuitlin chhoh zel a duh dante a sawi bawk.

He hunah hian Mizoram atanga Ministry of Tourism Scheme hrang hrang hnuaia Project thehluh te thlirho a ni a. Tourism Secretary Bhuvnesh Kumar chuan Tourism Ministry kalphung a inthlak chho mek tih sawiin, hmun tam taka Project te reuh te te siam lovin, State pakhatah Project lian tham pahnih khat kalpui a, khawvel huapa lang tham ‘destination’ siam tum a nih thu a sawi a. Hemi atan hian Scheme awmsa te pawh belh-khawma Scheme thar duan a nih thu leh tun atanga reilote ah approval hmuh a hman theih beisei a nih thu a sawi a ni. Scheme thar kalphung tlangpui an sawiho a ni bawk.

Tourism Minister Lalnghinglova Hmar chuan Mizoram-aTtourism hmasawnna ah khaw-tlang nen tangruala hmalakna, ‘Community-based Tourism’ leh Tourism Entrepreneur te an pawimawh hle tih sawiin, Tourism Ministry Scheme tharah pawh Component pakhat anga telh theih nise tiin rawtna a thlen a. Union Secretary chuan Central sawrkar pawhin a ngaihpawimawh thu leh Scheme tharah telh a nih tur thu a saiw nghal bawk a ni.

He inkawmna ah hian Ministry of Tourism-a Director General & Addl. Secretary Suman Billa pawh a tel bawk a ni.