Taxi leh Auto Rickshaw koh theihna tura duan MizoTaxi App chu hman theih turin tlangzarh a ni ta
Transport Department Directorate Conference Hall-a ‘MizoTaxi App’ tlangzarhna hunah hian Transport Minister Vanlalhlana chuan ‘MizoTaxi App’ chu Mizoram-a Public Transport tihchangtlunna kawnga rahbi thar pawimawh a ni dawn tih a sawi a. India rama Taxi aggregator service lian- Ola, Uber, Rapido-te awm mah se Mizote hman tura Mizopa siam ngei Mizoram-in kan nei ve ta chu ropui a tih thu leh sumdawng lian zawk ten hlawkna an um avanga rate to tak taka an siam ang ni lova awlsamna avang zawka mipuiin State Transport Authority (STA) rate ang thlapa an hmang thei tur chu hlu a tih thu a sawi a. “He app hi ram changkang zawkte ke pen ruala Mizoram pawhin hma a sawn ve theihzia tilang chiangtu a ni,” a ti.
Transport Minister chuan Taxi khalhtute pawimawhzia sawiin, “Driver mai an ni lo a, Mizoram Public Transport Ecosystem-a mi pawimawh leh Mizoram tana Ambassardor-te an ni a. Khualzin, Lengpui Airport atang emaw, Sairang Station emaw atanga rawn lutte biak hmasak ber chu Driver-te an ni,” tiin Khawvel thang zelin a ken tel Technology chu sawrkar inrelbawlna tha leh Public Service delivery tha zawk neih theihna hmanrua a nih avangin Transport Sector pawhin hma a sawn ve zel a ngaih thu a sawi a. Passenger-ten awlsamna an duh thu leh Digital Payment hi a tam zawk chuan an duh vek tawh thu a sawi a. Taxi Driver-te pawhin passenger nghak leh zawnga hun tam tak an sen thin thu sawi bawkin he Mizotaxi application hian heng harsatnate hi a sukiang ve ve thei dawn tih a sawi a. Mipuiin dik taka sawrkar rate pawmpui ang thlapa an chuan theih a, Driver-te pawhin chuanman chungchanga inhmuhthiam lohna awm thei an tawh lohna tur leh passenger tam zawk an hmuh theihna tur hmanrua a nih ngei a beisei thu sawiin, hlawhtling taka he app hi hman a nih theih nan mipui leh Driver-te thlawpna a ngen bawk a ni.
He hunah hian Transport Department Director leh State Transport Authority (STA)-a Secretary Er. R. Lalrammawia chuan Mizotaxi app hi mi eizawnna nek chep tura duan a ni lo tih sawiin, “Mipui ten sawrkar rate dik tak hmanga awlsam zawka Taxi an hman theihna tur kailawn a ni,” a ti a. Platform fee atana 6% an lak chungchang sawi zauvin, a tlem berah Rs. 5 leh a tam berah Rs. 10 lak a nih dawn thu leh he fee hi Mizotaxi app inrelbawlna (self-sustenance) senso phuhrutu tura ruahman a nih thu a sawi a, sawrkar sum tuakna hmanrua a nih loh thu a sawi bawk.
Nimin-a he hun hman hi STA Chairman leh Transport Department Secretary C. Lalruaia chuan kaihruaiin National Institute of Technology (NIT) Asst. Professor leh Digiride Technologies Pvt. Ltd. Director Dr. Lalhruaizela chuan Technical Report pein powerpoint hmangin Mizotaxi app hman dan a entir bawk a ni.
Online hmanga Taxi leh Auto Rickshaw koh theihna tura duan ‘MizoTaxi App’ ah hian hriat theih chinah lirthei 974 an inziaklut tawh a, heng te hi Four Wheeler Taxi 275, Two Wheeler Taxi 683 leh Auto Rickshaw 17 te a ni.
Taxi-a eizawngtute pawl pathum te chuan he app siam thar hi an dodal thu an lo sawi tawh a, State Transport Authority (STA) hotute chuan huntiam chhunga MizoTaxi a mipui mamawh khawp lirthei inziaklut an awm lo a nih chuan Two Wheeler Taxi 300, Four-Wheeler Taxi 200 bakah Auto Rickshaw chu Aizawl City chhunga domain tinah 10 theuh permit pekchhuah phawt a nih dawn thu an sawi tawh a. Tun dinhmun ah dodaltute thilphut chu ngaihtuah tumna a awm rih loh thu pawh an sawi bawk a ni.