Thisen Unit 100 pe chawimawi

Aizawl Electric Veng YMA Branch chuan an member C. Lalremruata’n thisen vawi 100 a pekna pualin nimin khan Electric Veng, YMA Hall-ah Branch pum huap Thisen pek runpui an huaihawt a, he hunah hian mipa 94 leh hmeichhia paruk, an vaiin mi 100 ten thisen an pe bawk a ni. Nimin-a thisen pek runpui buatsaih hi Health Minister Lalrinpuii chuan hmanpuiin tunlai khawvel changkang tawh takah pawh thisen hi mithiam te’n an la siam chhuah theih loh avangin a hlu êm êm tih sawiin, vawi 100 thisen pe thei C. Lalremruata chu thinlung taka a lawmpui thu sawiin, lawmpuina leh zahna thilpek a hlan a, mi engemaw zat ten lawmpuina hlanin Bialtu MLA leh Home Minister pawhin thilpek a hlan bawk a ni.