Kan sawrkar hi hmathlir thui tak neia ke pen kan ni - Chief Minister
Kawrthah Village Council-in ‘Deen Dayal Upadhyay Panchayat Satat Vikas, 2025’ hnuaia ‘Clean & Green Panchayat’ lawmman pakhatna an dawn lawmna hun nimin-a Govt. M/S-I Volleyball Court, Kawrthah-a an buatsaih ah hian Chief Minister Lalduhoma chuan PIB Press Release-a a lan danin India ramah hian Village (thingtlang khua) hi 6,65,000 leh Rural Local Body (VC kan tih ang hi) hi 2,68,000 an awm bawk tih sawiin, “Heti zat thingtlang khaw zinga Ministry of Panchayat ‘Clean & Green Panchayat 2025’ lawmman pakhatna dawng thei khua, Kawrthah North hnathawh hi a ropui ka ti a. A lawmnaah pawh hian rawn tel loh chi niin ka hre lo a ni,” a ti a. “Kan sawrkar hi hmathlir thui tak neia ke pen kan ni a. Kan Long Term Vision chu kum 2047-a India ram GDP-a zaa pakhat (One percent) lo thawhchhuah ve theih hi a ni. Chu hmathlir tihlawhtling tura kan tihtur hmasa chu khaw tinte Sustainable Development Goals tihpuitlin hi a ni. Khaw hrang hrangte SDG Index en theihna SDG Dashboard kan siam a, khaw tin Data kan lakhawm a. Kan hmalakna pawhin rah tha a chhuah a. NITI Aayog-in tunhnaia Second Edition of District Sustainable Development Goals Index Report a tihchhuahah khan India hmarchhak Bial-ah Hnahthial District chu pakhatna a ni a, Champhai District chu pahnihna a ni a, Kolasib District chu pakuana a ni a. District dang zawng zawngte pawh hi a titha pawl (front runner) an ni vek a ni,” a ti bawk.
Kan hmathlir dikzia tilang fiah turin Ministry of Panchayati Raj chuan Village Sustainable Development Goals hi a rawn vei ve chiah tih pawh Chief Minister chuan sawiin, “India ram pumah intihsiakna a kalpui a, Clean & Green huang ah Kawrthah North chu pakhatna in lo ni a. He khawtlang hian India ram hmathlir Viksit Bharat 2047 leh Mizoram hmathlir Viksit Mizoram 2047 te tihhlawhtlinna kawngah hna in thawk tha tihna a ni ta a ni,” a ti a. “Kawrthah North hian thingtlang mipuite hian Sustainable Development Goals tihhlawhtlinna kawngah thil tam tak an ti ve thei a. Infrastructure lian pui pui nena bultan kher lovin, mipui tangrual ten hna ropui tak an thawk thei a ni tih kha in tilang a ni,” a ti bawk.
Nimin-a Kawrthah North Village Council ten Deen Dayal Upadhyay Panchayat Satat Vikas, 2025 an dawn an lawmna hun hi Lalawmpuia Khiangte chuan kaihruaiin VCP C. Lalbiakmawia chuan inlawmna thu a sawi a, LAD Director Dr. Lalngura Tlau chuan Kawrthah North Village Council in he lawmman ropui tak an dawn dan tlangpui a sawifiah a. Ministry of Panchayati Raj hian mumal takin Panchayati Advancement Index (PAI) hmangin India rama VC tinte inelna a kalpui a. PAI data lut atangin khaw tinte an rawn endik a, Kawrthah North VC te hian data dik tak, a hmuna endik tlak ngei zel an lo thehluh avangin he lawmman hi an dawng ta tih a sawi a ni.
He hunah hian Khual zahawm Supply Minister B. Lalchhanzova pawhin IGGL Project hnuaia Gas pipeline thawh mek chu nakum February thla ah Sihhmui thlentir an tum thu a sawi a. “He pipeline hi a puitlin hunah chuan Hachhek tlangdung khua te hi Gas pipe connection kan pe thei turah kan in ngai a ni,” a ti bawk.
He huna tarlan a nih danin Kawrthah North-ah hian In tinin LED Bulb an chhi vek a, an VC hian ngaw nei tha hle mah se phun belh zel tur Thing tiak kuina, Green House an nei a, kumtin an phun belh a. In tinin LPG Connection an hmang a, Plastic bawlhhlawh zawng zawng VC ten an lei (buy back) a, an khaw chhung a fai em em reng bawk a ni.