Serchhip District-a ASF hri leng ala darh zau zel

Kumin-a Serchhip District-a African Swine Fever (ASF) hri leng chu a darh zel niin a lang a, Veng leh khua 20-ah ASF vanga Vawk thi leh suat sang hnih chuang a awm tawh a ni.
Hun engemaw chen Serchhip District-a ASF hri leng chu darh lo mah se tunhnaiah ASF hri hi a darh leh niin a lang a, kar kalta khan Chhuanthar Tlang-nuam leh Thenzawl-ah ASF vanga Vawk thi awm belh lehin heti hian kumin chhung hian Serchhip District-a Veng leh khua 20-ah ASF hri hi hmuh a ni ta a, chhungkaw 441 zet ten he hri leng avang hian harsatna an tawk tawh a, ASF vanga Vawk thi 1130 a awm tawh bakah Vawk 885 suat a ni tawh a, ASF vanga Vawk thi leh suat 2,015 a awm tawh a ni.

Chhinchhiahna atanga a lan danin Then-zawl-ah hian ASF vanga Vawk thi 15 awmin hri leng tur venna atana Vawk suat erawh a awm rih lo a, Chhuanthar Tlangnuam-ah ASF vanga Vawk thi 7 awm tawhin Vawk 2 suat a ni tawh bawk a ni. Kumin-a ASF hri leng hi Serchhip Town chhung bakah Chhingchhip, Lungpho, Khumtung, Ngentiang, Hriangtlang, Chhuanthar Tlangnuam leh Thenzawl-ah te hmuh a ni tawh a, hri leng tuar nasa ber chu Chhingchhip la ni zelin Vawk thi leh suat 449 zet a awm a, Serchhip Vengchung chuan dawtin ASF vanga Vawk thi leh suat 212 a awm tawh bawk a ni.