Serchhip District-ah Vawk thi leh suat 2297 awm tawh
Serchhip District-ah ASF vanga Vawk thi leh suat ala awm belh zel a, AH&Vety Department ten an chhin-chhiahna atanga a lan danin kumin chhung hian Serchhip District-a Veng leh khua 21-ah chhungkaw 507 zet ten ASF avang hian harsatna an tawk tawh a, ASF vanga Vawk thi 1319 awm tawhin hri leng darh zel tur venna atan Vawk 978 zet suat a ni tawh bawk a, kumin chhunga Vawk thi leh suat hi a vaiin 2297 zet a awm tawh a ni.
Chhinchhiahna atanga a lan danin Zir-tawpni kalta khan Serchhip District-ah ASF vang hian Vawk thi 46 zet a awm a, heng zinga 29 te chu Thenzawl-a Vawk thi chhinchhiah niin Hmuntha khua ah Vawk thi 14 chhinchhiah a ni bawk a, New Serchhip South-ah Vawk thi 2 a awm bakah Chhuanthar Tlangnuam-ah Vawk thi pakhat a awm leh bawk a. Zirtawpni vek khan Vawk suat pathum awm ve leh bawkin tunhnaia ASF hri hmuh tharna Thenzawl-ah Vawk thi leh suat 201 zet a awm tawh a, Hmuntha khua ah pawh Vawk 36 zet a thi tawh bawk a ni.