Serchhip District-ah E. Roll hearing neih tan a ni
Mizoram-a Electoral Roll 2026 siamthat hna kalpui mekah hian Draft Electoral Roll tar-chhuah a nih hnuah hming thun thar, paih ngai leh siamthat ngai bakah insawn duhte tana dilna hun hawn a nih hnuah heng dilna hrang hrangte hi chingfel turin hearing neih mek a ni a, Electoral Registration Officer (ERO) leh Assistant Electoral Registration Officer (AERO) ten Draft Electoral-a hming chuang, kum 2005 Eelectoral Roll-a zawmpui nei lo (no mapping) te, zawmpui nei, mahse, an inziah dana felhhlel awmte (mapping with discrepancies) leh rinhlelhawm leh enfiah ngai ni a hriatte bakah kum tling thar, siamthat duh leh insawn duh insawn dilna te endik a ni.
Tun tumah Hearing-ah hian a hmasa ber atan tunkar Nilaini khan 26-Serchhip (ST)-ah tanin Polling Station 3 - Thenzawl-I; Thenzawl-III leh Thenzawl-IV te tan ERO K. Lalhlimpuia leh AERO Vanthangpuia hovin neih a ni a, nimin khan chhunzawm a nih bakah 27-Tuikum (ST) AC tan Chhiahtlang-a Polling Station panga te tan neih niin ERO Rebecca Laldinmawii Hrahsel leh AERO Chawngthu Lalrinhlua ten an telpui a. Hei bakah hian 28 - Hrangturzo (ST) AC-a N. Vanlalphai-a Polling Station pali te tan ERO Dr. Marilyn Lalruatkimi hovin Hearing hi neih tan a ni bawk a, Vawiin lamah chhunzawm a ni ang.