Provincialise-a awm leh turin theihtawp chhuah tum

Mizoram Govt. Adhoc Aided Middle School Teachers’ Association (MIGAMSTA) chuan an dinhmun pangngai, Provincialise-a awm leh turin theihtawp an chhuah dawn tih an sawi.

Mizoram Govt. Adhoc Aided Middle School Teachers’ Association hian tunhnai khan thutkhawm neiin sawrkar in an chungchang a rel danah an lungawi lo tih thuchhuah siamin an tarlang a, he an thuchhuah ah hian khawtlangin a mamawhna avanga a din, mipuite hnen atanga thawhlawm khawn leh vantlang ram Reserve-te hralh phah hial khawp a an lo enkawl thin School, Zirtirtute pawhin hlawh mumal la mang lo leh khawtlang hmangaihna avanga tlawmngaih chhuaha an hmalam hun zawng zawng dahkhama an lo enkawl thin School-te chu kum 2003 khan Lump Sum Aided-ah hlankai niin, kum 2008 khan Adhoc Aided dinhmunah hlankai leh an ni tih an sawi a. Kum 2008-a Govt. Adhoc Aided Middle School a hlan kai School 64 zing atanga tehna hrang hrang hmanga Sawrkarin a teh hnua 2023 kum-a Provinsialise dinhmuna a hlankai takte kha School 48 an ni a, amaherawh chu 2024 kum khan heng School 48, Provincialise dinhmuna hlankai takte hi chhuanlam eng eng emaw siamin Sawrkar chuan a sut leh tih sawiin, Dan leh hrai fel lote siam that a nih hnuah an dinhmun pangngai Provincialise-a dah chhoh leh mai tura hrilh niin a changtu Minister ngei pawhin Provincialised a an awm zui leh nghal tur thu leh School Signboard leh Seal zawng zawnga ‘Government’ tih an lo dah tawh pawh thlak danglam lo tur leh hman zui leh nghal mai tur anih thu a hrilh niin an sawi bawk.

Hetihlai hian kumin-a sawrkar in Provinsialise Order a tihchhuah ah a hmaa Sawrkar-in a lo Provincialise tawh Adhoc Aided Middle School 48 zinga 4 chauhte chu Provincialise an nih thu pawh sawiin, Middle School 48 zinga 44 te chu tun dinhmunah an khua leh Veng mihring zat atanga teh pawhin Sawrkarin zirlai nei tura a phut zat 100 chu sang an ti hle tih sawiin, Sawrkarin a phut zat zirlai 100 chu engtikah maha tlin thei dinhmuna an din loh avangin he tehfung hi Sawrkar chuan ngaihtuah tha leh a, inang tlanga ‘Relaxation Clause’ hmanga an dinhmun pangngai, Provincialise dinhmuna dah let leh an phut tlat thu an sawi a ni.

Hei bakah hian Mizoram Government Adhoc Aided Middle School Association Member te chu mahni hmasial avanga dinhmun sang zawk beisei leh nawr an ni ngawt lo tih pawh sawiin, “Kan dinhmun ni sa min lak sak a, dinhmun hniam leh chhe zawk a min dah hi kan hrethiam thei lova, kan dinhmun tha sa (Provincialised dinhmun) kha min pe let leh thuai turin kan Sawrkar chak tak hi kan beiseiin kan phut tlat a ni,” tiin theihtawp an chhuah zel dawn thu an sawi bawk.