Police hna lak ah dik leh huaisen taka kal zel duh
Nimin-a thuchhuah an siamah Mizoram Police Subordinate Officers’ Association (MPSOA) chuan Mizoram Sawrkarin tunhnaia Sawrkar hnathawk a lakna ah dik tak a a thiam leh a tlingte chauh lak an ni thin chu lawmawm an tih thu sawiin, nikum (2025) August 25 atanga training mek, Mizoram Police Constable 259 (Unarmed/Armed/Mechanic) lakna ah pawh Party leh mimal induhsakna tel hauh lovin a tling leh titha te ngei lak an ni chu lawmawm an ti takzet tih an sawi a. “Mizoram Police Manual 2005 kan hman hnuah a vawi khat nan kum 19 ral hnuah Mizoram Police Manual 2005 ang thlapa Class-X (HSLC) pass chinte Constable atana lak an nite hi Mizoram Police tan hmasawnna mellung pawimawh tak a ni bawk,” an ti.
Tuna SI (UB) post 25 recruitment kalpui mek te, Approval awm tawh Recruitment la kalpui leh tur [SI (UB) 15 leh ASI (UB) post 10, ASI (M) 10, Constable 350 (UB-150, AB-200)]-ah te pawh dik tak leh huaisen taka kal zel tura Mizoram Sawrkar ngen bawkin, Subordinate Level Rank hrang hranga post ruak, SI (UB) 62, ASI (UB) 33, Constable 756 (UB), ASI (M) 120, MPRO (H/C 230, Constable 32), F&ES 57 leh Constable (AB) 2757, a vaiin 4047 vel awm mekte pawh hnawhkhah thuai a nih theih nana hma laksak leh turin Mizoram State Sawrkar an ngen thu an sawi bawk a ni.
Heng bakah hian Mizoram Police Subordinate Officers’ Association (MPSOA) chuan kumin June 18-a Mizoram Sawrkar-in ‘Assistance to States and Union Territories for Modernisation of Police’ (ASUMP) Scheme kaltlanga Mizoram Police te hman tur Motor thar 219 lai a pe chu lawmawm an tih thu pawh an thuchhuah ah hian sawiin, “Keini Ground Level-a Police hna bulpui ber thawktu Police Station, Out-Post leh Beat Post 60 laiin a ruala motor thar kan dawng vek thei hi a ropui kan tiin kan lawm hle a ni. Hei hian Police tha nasa taka tichakin rikrum thil, hnuchhuina leh sual dona kawngahte khawi hmun pawh rang zawkin kan thleng thei tawh tur hi Mizoram Sawrkar chungah MPSOA, General Headquaters chuan lawmthu a sawi bawk a ni,” an ti a. “Mizoram Sawrkar hruaitu, a bikin kan Chief Minister, Home Minister leh a thawhpui Home Department Officer leh Staff-te chungah te, Police Headquarters-a kan hotute, DGP, IGP Hqrs. leh Senior Officer dangte leh an Staff-te chungah MPSOA, General Headquaters, chuan thinlung takin lawmthu a sawi tak meuh a ni,” an ti bawk.