PMMSY ennawn mek a nih avangin Mizoram-ah Sangha no sem theih a ni rih lo

Fisheries Department chuan Pradhan Mantri Matsya Sampada Yojana (PMMSY) kaltlanga Sangha no an sem thinna Scheme chu sawrkar laipuiin a ennawn mek avangin an kalpui chhunzawm thei rih lo a; tunlai hian Mizoram hmun hrang hranga Lui lian-ah Sangha man khapna an puang mek bawk.

Akashvani News Aizawl zawhna chhangin Fisheries Department hotute chuan, Department-in an chhinchhiah danin Mizoram-ah Hectare 6367.58-a zau-ah Sangha Dil nei mi 22,661 an awm mek thu an sawi a; PMMSY atang hian Sangha no leh a chaw sem thin a nih thu sawiin, amaherawh chu sawrkar laipuiin Scheme hi a ennawn mek avangin Sangha no leh a chaw sem hi kalpui theih a ni rih lo tih an sawi a ni.

Sawrkar laipuiin PMMSY a ennawn mek hi PMMSY 2.0 tur a nih thu Fisheries Department hotute chuan sawiin, Scheme duan mek chu sawrkar laipuiin a tlangzarh hunah heng an thil sem thinte hi chhunzawm leh theih an inbeisei thu an sawi a; PMMSY Scheme atang lo hi chuan Sangha no leh Sangha chaw semna tur pawisa an neih loh thu an sawi bawk.

Fisheries Department hotute chuan tun thla, July ni 10 atanga thla thar, August ni 10 chhung atana Mizoram hmun hrang hranga Lui lian-ah te Sangha man khapna an puan mek thu sawiin, tlawmngai pawlte nen heng he khapna ah hian an thawhho tlat thu an sawi a; mipuite chu Sangha man khap hi nakina Sangha-a intodelhna tur zawk a ni tih hriaa zawm hram hram tur leh Dan ang chuan Sangha man turin license neih a tul thu an sawi bawk.