PHE Minister leh Embassy of Israel te an inkawm

Public Health Engineering (PHE) changtu Minister Prof. Lalnilawma leh Embassy of Israel, MASHAV – Israel’s Agency for International Development Cooperation-a Senior Water Resources Specialist Neeraj Gahlawat-te chu New Delhi-a Mizoram House-ah niminpiah khan an inkawm a, Mizoram-a mipuite hnenah tui thianghlim zawk pek theih dan tur te, tui hmanhnu (wastewater) tihthianghlim dan tur te, tuihna humhalh leh siam belh dan kawngte bakah environment humhalhna kawngah thawhho dan tur te an sawi dun a ni. He inkawmna ah hian PHE Minister chuan Mizoram dinhmun hriatchian nan remchang hmasa berah MASHAV hotute chu Mizoram rawn tlawh a zirchiang turin a sawm a, a taka thawhho theih dan kawng zawna hmalak vat a tul thu a sawi bawk.

He inkawmhonaah hian India leh Israel thawhhona MASHAV hnuaia Embassy of Israel leh Mizoram Sawrkar inkara Water Sector-a thawhhona tihchak zêl dân tur leh hmalâkna tûrte ngaihtuah a ni a. Embassy of Israel chuan Israel ramin a neih, tui enkawlna hmanraw thar leh hmasawnna hmanga India ram leh State Sawrkar hrang hrangte nena thawhhona a kalpui mek angin Mizoram nen pawh thawhhona neih tum a nih thu an sawi a ni.

Embassy of Israel chuan Aizawl khawpui chhunga tui thianghlim lakna hmun, chhan hrang hrang avanga chhe mekte thlangchhuak turin a ti a. Thlanchhuah a nih hnuah Israel thiamna leh hmanraw thar hmangin a hmunhma siamthat leh humhalh zui dan turte enfiah a ni anga, a taka hnathawh theih dan tur (technical feasibility) leh sum awm dan (funding) a zirin pilot project te, zirtirna (capacity-building) leh sum hnar zawnna (resource mobilisation) thlenga thawhho zui theih dan tur kawng zawn a nih tur thu an sawi bawk a ni.