Online IAS Coaching kal tur kawm

Mizo thalai a thlawna Online IAS Coaching kal tura thlan mi 15 te chu nimin khan Higher & Technical Education Minister Dr. Vanlalthlana chuan a Pisa-ah kawmin a fuih a, he hunah hian Minister chuan Mizo zirlaite tana a thlawna IAS Online Coaching kum 2 chhung atana buatsaih a ni chu Higher & Technical Education Department hotute thahnemngaihna te, Mizo thalaite tana Arun Balgotra IPS inpekna te leh Shankar IAS Academy-te thilphalna vang a ni tih sawiin, an chungah lawmthu a sawi a ni.

Aizawl North SDPO nilai Arun Balgotra IPS chuan Mizo thalaiten a thlawna IAS Coaching an kal theihna turin Shankar IAS Academy, Chennai te leh Mizoram Sawrkarin thawhhona an neih theih nan hma lain a hlawhtlinna hmuh a ni a, Mizo zirlai mi 15-te chu Online IAS Coaching kal tur hian thlan niin nimin-a he hun hman ah hian Arun Balgotra pawh hian thu a sawi a. Ani bakah hian H&TE Director Laltanpuia leh Department mi pawimawh dangte an tel bawk a ni.