Observer in Serchhip tlawh

Electoral Roll Special Intensive Revision (SIR) 2026 neih meka Serchhip District tana Observer tura ruat, Social Welfare, Women and Child Development Department changtu Commissioner & Secretary, Lalzarmawii chuan nimin khan Serchhip rawn tlawhin Electoral Roll siam hna thawh meka thawktu hrang hrangte a kawm.
Serchhip DC Meeting Hall-a thawktute a kawmna ah hian Serchhip District-a Special Intensive Revision 2026 kalpui mek chungchang leh Draft Electoral Roll buatsaih dan te sawiho niin Observer chuan SIR 2026 hmalakna ah Serchhip District chuan hna an thawk tha a tih thu sawiin, DC leh a thawhpuite bakah BLO leh thawktu dang zawng zawngte chungah lawmthu a sawi a. Draft Electoral Roll-a la chuang ve lo, khua leh tui dik tak, kum tling tawhte chu an chuan vek theih nan Draft Roll-ah siam that ngai a awm em tihte ngun taka en a, thawhhona tha tak nena hma la chhunzawm zel turin a chah bawk.

He hunah hian District Election Officer leh Bawrhsap, Paul L. Khuma chuan Electoral Roll dik leh felfai tak a awm theih nana BLO-te thawhrimna a fakawm takzet tih sawiin, Election Branch-a thawk leh Department mite pawh Office atanga thawk mai lovin, a tulna apiangah, a hmun ngei ah te intlawhchhuaka, an intawiawm thin thu a sawi a, thawktute inpeknaah lawmthu a sawi bawk.

Nimin-a Observer hova inkawmna ah hian Election Officer, Lalchhanhimi chuan Serchhip District-a Special Intensive Revision 2026 kalpui dan leh hma an lak dan tlangpui te a lem nen a sawifiah a, Deputy District Election Officer Dorothy Muansangi bakah Serchhip District chhung Assembly Bial pathum-a ERO leh AERO te an tel bakah tlawm-ngai pawl leh Political Party hrang hrang aiawhte pawh an tel bawk a. SIR kalpui meka hriat tur pawimawh te an inzawtfiah bawk a ni.

Observer hian thawktute a kawm hnuah New Serchhip-II Polling Station leh New Serchhip-V Polling Station te tlawhin an dinhmun a enfiah nghal bawk a ni.