NEET Exam paper put ru-a lungawilohna lantirin MZP huaihawtin 'Peaceful Protest' neih a ni
Aizawl-ah chuan ‘Peaceful Protest’ hi Vanapa Hall kawt-ah neih niin MZP President C. Lalremruata chuan, kumin NEET-UG exam zawhna pûtru vang hian Mizo zirlai 2,000 velin an tawrh thu leh pawi an tih thu a sawi a; he thil thleng hi a demawm takzet thu leh NEET-UG paper pûtru duh lohna lantira hmalakna hrang hrangte chu an thlawp tlat thu a sawi bawk a ni.
Serchhip-ah pawh kumin-a NEET-UG exam zawhna put ru avanga Union Education Minister, Dharmendra Pradhan bang tura phuta Delhi khawpui Jantar Mantar-a pungkhawmte thlawpna lantirin nimin zing dar 9:30 khan Serchhip Bazar Tual-ah MZP Hqrs. Serchhip bultumin zirlai an pungkhawm a, he hunah hian Govt. Serchhip College bakah Govt. Higher Secondary School leh Brilliant HSS Serchhip atangin zirlai 350 vel an pungkhawm a, he hun hi MZP Hqrs. Serchhip President, Darchhuana chuan kaihruaiin an punkhawm chhan ngaihthlak a nih bakah an thilphut hrang hrang tarlanna thuziak kengin an aurual a, tawngtai rualna hun an hmang bawk.
MZP huaihawta Mizoram hmun hrang hranga ‘Peaceful Protest’ a tel te hian Resolution paruk (6) pass in ‘NEET (UG) 2026 Exam-a Question leak out hi kan dem takzet a, a thlen nawn tawhloh nan Central Sawrkarin hma la nghal rawh se,’ tih te; ‘NEET Question leak out avanga kan zirlaipui nunna chan ta te hi kan tawrhpui takzet a, sawrkarin zangnadawmna pe ngei rawh se’ tih te; ‘Exam dan kalphung langtlang leh tha zawk kan neih theih nan National Testing Agency (NTA) siamthat ni rawh se,’ tih te; ‘He thil thleng avanga Peaceful Protester te chunga Police te tharum thawhna thleng hi kan dem takzet a, democracy ramah hetiang hi thleng nawn tawhlo se kan duh,’ tih te; ‘Tihluihna hmanga he protest hmahruaitu Sonam Wangchuk, sawrkarin Safdarjung Hospital-a tihluihna hmanga a hreng lui hi kan dem takzet a, thu tiamkam awm lova chhuah nghal turin kan phut a ni,’ tih leh ‘Mizo Zirlaite himna leh hamthatna atan vawiin a Mizo zirlai leh thalai kalkhawmte hian lungrual taka thawhho zel nise kan ti. ‘Mizo Zirlaite himna leh hamthatna atan Vawiin-a Mizo zirlai leh thalai kalkhawmte hian lungrual taka thawhho zel nise kan ti,’ tih te a ni.