MRB in hmarchhak-ah dinhmun sang an luah
.png)
Nimin-a tlangzarh tak ‘MRB 43rd Annual Report’ in a tarlan dan chuan sawrkar kum liamta 2025-2026 chhung khan Mizoram Rural Bank (MRB) chuan sum chevel, deposit (sum dawn) leh loan pek chhuah cheng vbc. 10,656.08 nei tlingin nikum aiin za zela 11.26 in a tam a, India hmarchhak State Rural Bank zingah sum che vel tam ber an ni a. Hei bakah hian Hlep (Net Profit) cheng vbc. 152.27 hmuin India hmarchhak State Rural Bank zingah pahnihna a ni bawk a. Hei mai bakah hian Bank Branch tin sum khawih zat Business per Branch (BpB) cheng vbc. 100 aia tam nei thei India ram Rural Bank pali zingah telin, BpB cheng vbc. 100.53 a nei tling bawk a. Thawktu pakhat zel sum khawih zat, Business per Employee cheng vbc. 21.70 nei tling phain, India ram Rural Bank zingah pahnihna a ni a, hmarchhak State-ah pakhatna a ni bawk.
MRB-ah hian sawrkar kum liamta chhung khan sum chevel zinga za zela 97.36 chu Digital Financial Transaction ni phain, hmarchhak State-a titha ber leh India ram pumah pahnihna a ni a. Credit-Deposit (CD) Ratio za zela 63.29 neiin, hmarchhak State Rural Bank zingah pahnihna a tling phak bawk a. Pradhan Mantri MUDRA Yojana (PMMY) hnuaiah DFS target za zela 154 thleng phain hmarchhak State Rural Bank zingah a sang ber a ni.
Mizoram Bank zingah MRB hi loan pechhuak hnem ber niin an loan pekchhuah hi cheng vbc. 4,129.98 a tling a, sum dahluh dawng tam ber dawttu niin cheng vbc. 6,526.10 a tling phak bawk a. Sawrkar Scheme pawimawh tak takah hmahruaitu niin Mizoram chhunga Pradhan Mantri Jan Dhan Yojana (PMJDY) hnuaia account za zela 78, Pradhan Mantri Jeevan Jyoti Bima Yojana (PMJJBY) hnuaia inziaklut za zela 56, Pradhan Mantri Suraksha Bima Yojana (PMSBY) hnuaia inziaklut za zela 53 leh Atal Pension Yojana (APY) hnuaia inziaklut za zela 43 te chu MRB hnuaia mite an ni.
Heng bakah hian khawtlanga dawmkan ngai zual te tan loan pe chhuakin Self-Help Groups (SHGs) zinga za zela 95, National Rural Livelihoods Mission (NRLM) hnuaia za zela 90, National Urban Livelihoods Mission (NULM) hnuaia za zela 79, Kisan Credit Card (KCC) scheme hnuaia za zela 67, MUDRA hnuaia za zela 29 leh Prime Minister's Employment Generation Programme (PMEGP) hnuaia za zela 27 te hi MRB kaltlanga loan pekte an ni bawk tih an Annual Report-ah hian tarlan a ni.