MizoTaxi app hman chungchang ah CM hmuh tum

Mizoram-a Taxi hrang hrang hruaitute chuan MizoTaxi app hman meka an duh loh thil te sawipui turin Chief Minister hmuh an tum thu leh an la nghah mek thu an sawi.

Inrinni-a thuthar thehdarhtu thenkhat ten an kawmna ah Mizoram Taxi Association President K. Lalrinliana chuan lirthei hmanga eizawng Taxi pawl pathum hruaitute chuan Chief Minister hmu turin appointment an dil tih sawiin, an duh anga rangin an la hmu thei lo tih a sawi a, an hmuh veleh Chief Minister chu an harsatna sawipui an tum dawn tih a sawi a. MTA President K. Lalrinliana chuan Chief Minister hnenah hian MizoTaxi App a hman tur rate ennawn chungchang te, a app chhunga belhchian dawl lo leh siamthat ngai nia an hriat bakah an harsatna hrang hrang thlen an tum thu a sawi a. High Court-a khin a tum chu Chief Minister hmuh phawta, chuta an inbiakna azirin hma lak zel an tum thu a sawi bawk a ni. 

Tarlan tawh angin Aizawl khawpui-a Taxi service mek te tan hian MizoTaxi app hman tura ruahman phawt niin hetihlai hian Taxi lam hian an dodal rih mek thung a. Tun thlengin Taxi inziaklut hi 849 an awm tawh a, heng inziaklut te hi Taxi ke pali nei 231, Ke pahnih nei 603 leh Auto Rickshaw 15 a ni a. MizoTaxi app hmangtu Taxi te hi Inrinni atang khan thla thar ni 10 thleng tlan loh ni nei lovin tlan tir chhin an ni bawk.