Mizoram-a tlanchhia te dawnsawn dan ngaihtuah tul ti

Home Minister K.Sapdanga’n Bangladesh tlangram atanga Mizoram-a rawn tlanchhia Zo hnahthlak leh ni kher lo te chu engtia lo dawnsawn tur nge ni ang tih ngaihtuah a tul tih a sawi.

Nimin khan ‘The Zozam Times’ buatsaihin Aizawl-a IPR Auditorium-ah ‘Bangladesh-a Tribal chimral mekin Mizoram a nghawng theih dan leh Chittagong Accord’ tih thupui hmanga Seminar an buatsaih a hmanpuina ah Home Minister K. Sapdanga chuan Bangladesh tlangram-a Zo hnahthlak chengte chu an ram ril zawka bit taka cheng Muslim-ten an chenna hmuna chen an duh a, lut an tam a, hei vang hian himna zawngin an tlanchhe ta tih a sawi a. Hetianga nawr chhuah zingah hian Chakma leh Bru pawh an tel thu sawiin, “Kohhran ten chhandam ngai an nih ve tho hriain an lo enkawl a, tlawmngai pawl leh political party ten ram himna ngaihtuah chungin an lo dawng-sawng bawk a. Hetiang karah hian Zo hnahthlak leh ni kher lo te pawh engtia lo dawnsawn tur nge tih hi ngaihtuah a ngai ta a. Sawrkar pawhin ngaihtuahna sen a ngai ta a ni ang,” a ti a. He Seminar hi Sawrkar, Hnam, Kohhran leh tlawmngai pawlte tan pawha ngaihtuahna mit tikeutu a nih theih a beisei thu a sawi bawk.

He zirhona hun hi The Zozam Times Editor, Tuikhuahthanga chuan kaihruaiin Khual zahawm leh Adviser to Chief Minister (Political) Lalmuanpuia Punte pawhin thu a sawi a. He hunah hian Mizoram University-a Associate Professor Dr. Lalrinnunga Hmar chuan thupui a sawi hawng a. Pachhunga University College-a Associate Professor Dr. Lalthlamuana Ralte kaihhruaiin sawihona hun hman zui niin he hunah hian tlawmngai pawl, political party, MZP leh MSU, hnam pual zirlai leh College hrang hrang Students’ Union aiawh bakah hemi lama tui mi te an tel a ni.