Mizoram State Core Committee on Ruihhlo Do ten an hmalakna hrang hrang an thlirlet
CM Conference Hall-a thutkhawm hi Chief Minister Lalduhoma chuan kaihruaiin ruihhlo dona kawnga hmalatu Department leh tlawmngai pawlte chungah lawmthu sawiin, tunah hian ruihhlote hi do rem vek lo mahila, kan hmalakna hi a sawt hle tih a hmuh theih a ni, a ti. He thutkhawm ah hian Home Minister K. Sapdanga leh Excise Minister Lalnghinglova Hmar te pawh telin Excise & Narcotics, Police Department, Social Welfare leh Central YMA atangin an hmalakna report ngaihthlak a ni a. Excise & Narcotics Department hmuh danin Operation Jericho kalpui hnuah nasa takin ruihhlo tawlhruk a tlem a, a man pawh a to chho a. Khuh damdawi thlengin a man hi a to chho a ni.
Police Department chuan kum 2025 khan ruihhlo kaihhnawih ah thubuai 319 ziaklutin mi 483 an man a, kumin ah June thla thleng khan thubuai 219 an ziaklut tawh a, mi 312 an man tawh bawk a, thubuai ziahluh leh mihring man zat a pun chhan hi kum hmasa lamah khan ruihhlo hi a hlawm lian deuhin an tawlhru thin a, kumin atang hian tlem tham te tein an tawlhru nia hriat a nih bakah Police in hmanraw tha zawk nena a do hna an thawh tak vangin a tawlhrutute hi an man tam ve tial tial nia hriat a ni.
Social Welfare Department report atanga a lan danin Hulhhliap Short Stay Centre kalpui tawh zawng zawngte endikna (follow-up) atangin SSC-a lut za zela sawm thum (30%) ten ruihhlo hi an sim hlen a, he Centre-a kal mi 198 te chu Skill Training chi hrang 13 pek an ni a, an zinga mi 21 te chu Bana Kaih CM Special Package pek an ni. Hulhhliap-ah hian sawrkar chuan mi pakhat enkawl nan Rs. 15,422 seng zel anga chhut a ni.
Central YMA chuan Anti-Drugs Squad hmanga hma an lakna leh Operation Jericho an kalpui dan tarlangin, hna an thawhna tur lirthei engemaw zat an neih chu an tangkaipui thu an tarlang a. Sawrkar puihnain Central YMA hian TBCC- ah ruihhlo ngaite enkawlna an sak belh mek a ni.
Nimin-a thutkhawm ah hian Heroin a lo tlem a, a man a lo to tak hnu hian Ganja a lo hluar tak thu leh hmeichhe naupangte pawhin an zuk thu tarlan a ni a. Chutiang bawkin Khuh damdawi pawh hi a hluar chho mek nia tarlan a ni bawk a. Naupangte hnena ti lo tura zirtirna chu Mission mumal tak anga School Education leh Kohhran hrang hrangte hmanga kalpui a tul hle nia ngaih a ni a. Heng thilte dan hmanga khuahkhirhna Mizoram State mil tur duangtu tur an din nghal bawk. Heng bakah hian Court-a thuhretute kal man pek thin chu awlsam zawka kalpui a nih theih nan IFMIS paltlang lo (exemption) tura tih a ni a. Veng leh khaw tina ruihhlo dotu pawl nung tak din dan ngaihtuah an remti bawk.