Mizoram Rajya Sabha MP 8-na atan K. Laltluangkima lakluh a ni ta
Nimin-a Parliament Fur thutkhawm neih ni hmasa bera Rajya Sabha thutkhawm ah Mizoram Rajya Sabha MP atana thlantlin Khiangte Laltluangkima (K. Laltluangkima) hi Rajya Sabha Chairman, C. P. Radhakrishnan an rinawmna thutiam tirin a lalut a, he hunah hian amah chauh hi lakluh niin thutiam a lak hnu hian Rajya Sabha thutkhawm ah tel nghal a. “Vawiin July ni 20, 2026 (Thawhtanni) hian Rajya Sabha-a Mizoram State aiawh tura lakluh ka ni ve ta a, Pathian chungah leh kan sawrkar te, kan hruaitute leh Mizoram mipui zawng zawng chungah lawmthu ka sawi a ni,” a ti.
Mizoram Rajya Sabha MP 8-na tur K. Laltluangkima lakluhna hunah hian MP thlan thar hi Mizoram atangin mi 16-in an tawiawm a, Mizoram sawrkar aiawhin, Mizoram Legislative Assembly Deputy Speaker Lalfamkima, Mizoram House Addl. Resident Commissioner Alexander V. Chongthu leh Lunglei North Bialtu MLA V. Malsawmtluanga te bakah ZPM Party aiawhin Dr. Kenneth Chawnglian leh Mizoram Electric Regulatory Commission Chairman leh K. Laltluangkima nau ni bawk, Benjamin L. Tlumtea leh an chhungkhat laina leh thiante an tel a ni.
Mizoram Rajya Sabha MP thar K. Laltluangkima hi MP kalchhuak ta K. Vanlalvena thlak turin thla hmasa June ni 18-a Mizoram Assembly Annexe-a Rajya Sabha MP thlanna neih ah vote 36 tla zinga vote 26 hmuin thlantlin a ni a, he inthlanna ah hian a khingpui awmchhun MNF Candidate Zothansangi Hmar chu a hneh a. Mizoram Rajya Sabha MP tling tur hian vote 21 hmuh tlin a ngai a, vote nei MLA 40 zinga MLA 36 in vote an thlak a, BJP MLA pahnih leh Congress MLA pakhat te’n vote an thlak lova, hei bakah hian ZPM MLA pakhat W. Chhuanawma chuan a hriselna dinhmun that loh avangin vote a thlak lo bawk a ni.