Mizoram Police Constable lak thar 275 ten PTS Thenzawl-ah Passing Out Parade an nei

Nikum (2025)-a Mizoram Police Constable tura lak mi 275 te chuan nikum August 26 atanga Thenzawl-a Police Training School-a Basic Training an neih hnuah Inrinni, July 18, 2026 khan Passing Out Parade an nei a, he hun hi Chief Minister Lalduhoma chuan khuallian niin a hmanpui a ni.
PTS Thenzawl Parade Ground-a Mizoram Police ‘70th Batch Recruit Constable Passing Out Parade’ ah hian Chief Minister Lalduhoma chuan Mizoram Police Constable lakna chu Sawrkarin ‘Equality for All’ tih thupui hmanga dik taka kalpui a nih thu sawiin, tumah duhsak bik nei lova mipuite rawngbawlna ah rinawmna, thiamna leh dik taka an mawhphurhna hlen turin a fuih a, Police Training School-a training hmanrua leh infrastructure-te tihchangtlung zel a nih chhan pawh recruit-te training tha zawk an dawn theih nan a nih thu sawiin, Police personnel-te chu an hnathawh chhung zawngin hriselna leh fitness vawngnung zel turin a chah bawk.

Mizoram Police ‘70th Batch Recruit Constable Passing Out Parade’ a tel te hian nikum (2025) August 26 khan Basic Training (2025-2026) nei tanin chawlhkar 45 chhung Training neiin a tirah mi 277 ten Training hi neiin mipa 249 leh hmeichhia 26, an vaiin mi 275 ten Training hi an zo a, Training chhung hian India ram Dan thar pathum- BNS, BNSS leh BSA, Cyber Crime, Forensic Science, Public Order, Human Rights, Disaster Management leh Police hnathawhna atana thil pawimawh tam tak zirtir an nih bakah, Physical Training, Drill, Weapon Training, Field Craft, Tactics leh Police duty atana tul Operational Skill hrang hrangte pawh zirtir an ni a. Recruit-te chu kawng hrang hranga hman tlaka an nih theih nan an zirlai-ah Computer Education, Sports, Cultural Programme leh Community Engagement Programme-te pawh telh a ni bawk.

Inrinni-a Passing Out Parade an neih ah hian Recruit Constable-te chuan march past an entir hnuah PTS Thenzawl-a Principal kaih-hruaina hnuaiah Police thutiam an la a, India Danpui leh Dante zahin, rinawm tak leh dik taka mipuite laka an mawhphurhna hlan turin thutiam an la a, hemi hnu hian Director General of Police (DGP), Mizoram Sharad Agarwal IPS pawhin thu sawiin Constable-te chu Police Department kut ke ber nih thu leh chawlhkar 45 training an neih chuan mi pangngai atangin Dan leh thupek vengtu, discipline leh thiamna nei Police personnel-ah a siam ta tih a sawi a. Mizoram Police modernization lama an tanpuihna leh duhsakna avangin Chief Minister leh Home Minister te hnenah lawmthu a sawi bawk.

He hunah hian Home Minister K. Sapdanga leh Police Officer pawimawh bakah sawmbik mi thahnem tak an tel a ni.

Training chhunga titha Medal leh Running Trophy dawngtute :

• Governor of Mizoram Running Trophy & Gold Medal (All Round Best) : Cons. No. 193 F. Lalngaihzuala

• Chief Minister Running Trophy & Gold Medal (Proficiency in Drill): Cons. No. 189 H. Lalremruata

• Home Minister Running Trophy & Gold Medal (Proficiency in Legal Studies): W/Cons. No. 254 Vanlalawmpuii

• DGP (M) Running Trophy & Gold Medal (Proficiency in General Studies): Cons. No. 199 Tluangzathanga Jahau

• Addl. DGP Running Trophy & Gold Medal (Proficiency in Weapon): Cons. No. 161 K. Lalhmangaihzuala

• IGP (Hqrs.) Running Trophy & Gold Medal (Proficiency in Physical Training): Cons. No. 201 Zirnunsanga

• DIG (Training) Running Trophy & Gold Medal (Proficiency in Shooting): Cons. No. 101 Richard J. Lalthanmawia

• Principal, PTS Running Trophy & Gold Medal (Exemplary Conduct): Cons. No. 193 F. Lalngaihzuala