Mizoram leh Assam Tourism Minister te inkawm

Tourism Department changtu Minister Lalnghinglova Hmar chuan Inrinni khan Assam Tourism Minister Ajanta Neog-i chu Guwahati-a a chenna In-ah kawmin Tourism hmasawnna kawnga Assam leh Mizoram sawrkar thawhho dan tur a sawipui.

He inkawmna ah hian Mizoram Tourism Minister Lalnghinglova Hmar chuan Mizoram-in nikum September thla atanga Rail Connectivtiy a neih hnuah nasa takin khualzin an pung tih sawiin, “Mizoram tlawhtu khualzin tam zawk hi Assam atanga lo kal an ni. Hei hian Tourism kaihhnawihah State pahnihte inkara thawhhona tha zawk neih a tulzia a tilang a, thawhhona nghet zawk kan neih chhoh ngei ka beisei.” a ti a. Assam Tourism Minister pawhin Mizoram nena thawhona tha neih chu Assam duhthusam a nih thu leh, State pahnih tana thil lawmawm a nih thu a lo sawi ve bawk.

State pahnih Tourism Minister-te chuan Department kaltlanga thawhhona mumal zawk neih tha tiin India rama lang tham Tourism-a hmasawnna chak leh langsar nei tur chuan Assam leh Mizoram mai bakah North East State zawng zawng thawhho tlan a pawimawh zia an sawi a. Minister Lalnghinglova Hmar chuan Mizoram sawrkarin kumin chhunga Tourism Event leh Festival hmachhawp a neihte Assam Tourism Minister chu hrilhin, Mizoram lo tlawh a, Festival te hmanpui turin a sawm a. Assam Minister Ajanta Neog-i pawhin lo zin ngei a tum thu a lo hrilh bawk a ni.

Tourism Minister Lalnghinglova Hmar hian Guwahati-a Event Mangament, Tourism leh Hospitality lama company lian leh langsarte intawhkhawmna, ‘Imaginarium 2.0- North East Events & Entertainment Leaders' Summit’ neih mek chu Mayfair Spring Valley Resort, Guwahati-ah a hmanpui nghal bawk a ni.