Mizoram chak lakna kawngpui siamthat phut

Mizoram Tipper Association Joint Committee chuan Mamit leh Kolasib District-a Mizoram mamawh lak luhna kawngpui chhia chu thla thar August ni 10 hma ngeia siamtha turin Mizoram sawrkar leh NHIDCL an ngen a; Assam atanga Mizoram-a Balu phur lui an awm chuan an chungah engpawh thleng se mawh an phurh dawn loh thu an sawi bawk.

Mizoram Tipper Association (MTA) General Hqrs, Aizawl; All Mizoram Commercial Tipper Association (AMCTA) leh MTA District Hqrs, Kolasib te intelkhawmna Mizoram Tipper Association Joint Committee chuan nimin khan thuchhuah siamin Mamit leh Kolasib District chhunga Mizoram in a mamawh tam zawk phurhluhna leh phurh chhuahna kawngpuite chu a chhe hle tih tarlangin, helai kawng hi chak taka thawmthat hna thawk turin Mizoram sawrkar leh NHIDCL-te an ngen a, August ni 10 hmaa an duh anga tlan nuam tawk taka siam a nih loh chuan an thiam dan leh an rem hriat dan angin hma an la dawn tih an tarlang a ni.

Assam atanga Mizoram-a Balu phurhluh pawh a him tawk lo nia an hriat thu leh Mizo Motor-te enhran an nih êm avang leh balu phur motor pali an man avanga lungawi lohna lantir nan tiamchin awm lova thenawm State balu-te phurhluh tawh rih loh an rel thu pawh an thuchhuah ah hian tarlangin Joint Committee chuan, phurlut lui an awm a nih chuan an chungah engpawh thleng se a mawh an phurh dawn loh thu te, State pawn mite chu Mizoram chhunga leilung hausakna - Balu, Tiau, Lung leh adangte chuhpui lo tura an ngen bakah, phur lui an awm a nih chuan an chungah engpawh thleng sela an sawibuai theih loh thute an tarlang bawk.