Mizoram-a Anganwadi Centre 300 Solarization turin SWW&CD leh SELCO Foundation ten MoU ziak
SAD Conference Hall-a he thawhdunna thuthlung ziah ah hian Mizoram sawrkar aiawhin SWW&CD Commissioner & Secretary Lalzarmawii leh SELCO Foundation Senior Project Manager Lalnuntluanga ten an hming an ziak a, Minister Lalrinpuii chuan naupangte an lo thanlen nan leh an hmasawnna turin hmun him, mi zawng zawng tel theihna leh an mamawh phuhru thei environment an neih theihna tur chu Mizoram sawrkar chuan a ngaih pawimawh thu a sawi a. SELCO Foundation nena an thawhhona hian Anganwadi Centre-te chu sustainable energy hmangin a tichak dawn tih pawh sawiin, he hunah hian CDPO leh CO lo kalte chu fuihin, Field visit nei tam tur leh inelna thianghlim nei nasa turin a chah bawk.
MoU ziahna hun kaihruaitu SWW&CD Commissioner & Secretary Lalzarmawii chuan Mizoram Anganwadi Centre 300-a Solarization kalpui a ni tur chu lawmawm a tih thu sawiin, Solar power pawimawhzia a sawi bakah MoU ziah a ni thei chu lawmawm a tih thu a sawi a. He thawhhona hi hun lo kal zel turah tangkai leh entawntlak tak a nih a beisei thu a sawi bawk a. SELCO Foundation Project Manager Laltanpuia pawhin Decentralised Renewable Energy (DRE) solution leh infrastructure development support hmangin Anganwadi Centre-te chu hmun tha zawk, hman tlak zawk leh energy hman dan tha zawk an nih theihna turin thawhhona kalpui a nih tur thu sawiin, December 2026-ah he Solarisation hi zawh tum a nih thu a sawi a bawk a. Mizoram pumpui huam zawka hmeichhia leh naupangte hriselna, nutrition leh zirnate tha zawk a lo thlen theihna turin hma lak tum a nih thu a sawi bawk.
Kum hnih chhung kalpui tur he thawhhona hian khawtlang leh vengchhung a hmeichhia leh naupangte tan Early Childhood Development, Nutrition leh Health Service-te tihchangtlun a tum a. Hmun hla leh service pekna remchang tawk lo hmunte pawh huamin Community-te mamawh phuhru thin heng Centre-te hi an kaihhruaina tihchak tum a ni bawk. Programme hi rei tak kalpui theihna turin Local Capability tihchak chu ngaih pawimawh a ni a. Anganwadi Worker (AWW)-te, Anganwadi Helper (AWH)-te leh sawrkar official-te chu system dahte thawh dan leh enkawl dan chungchang ah training pek an ni anga. Last-mile level-a model tha tak takte tihlan leh zirchhuah theihna turin Saksham Anganwadi Centre 10 chu tihchangtlun niin, demonstration centre-te angin hman an ni dawn bawk a ni.