Mizoram-ah VB-G RAM G hawnna neih niin State sawrkar atangin vbc. 67.95 hmuh a ni tawh
Mizoram sawrkar Rural Development & Administrative Department (RD&AD) buatsaiha VB-G RAM G hawnna hunah hian RD&AD Minister Prof.Lalnilawma chuan mipui ten ni 100 inhlawhna an hman tangkai dan sawiin, VB-G RAM G pawh Mizoram sawrkarin a hlawhtlin theih nan theihtawp a chhuah nghal thu leh Mizoram chu India ram pumah a Scheme Notification chhuah hmasa ber a nih thu a sawi a. State sawrkarin VB-G RAM G-a a tum ve tur cheng vbc. 128 pawh CM leh0 Finance lam ten ngaipawimawhin, sum lamah pawh harsatna a awm dawn loh thu a sawi a, a hlawhtlinna tak tak erawh mipui te, VC te, Official te thawhhonaah a innghah tur thu a sawi bawk.
Minister chuan VB-G RAM G Scheme-in a ngaihpawimawh pakhat chu Tui hnianghnar taka neih (Water security) a nih thu pawh sawiin, PHE nen tangkawpin tuikhuah rintlak tak siam an tum thu a sawi a, India leh Israel sawrkar tangkawpin Mizoram-ah tui hnianghnar taka a awm zel theih nan hmalakna kalpui mek a nih thu a sawi bawk a. He scheme thar hnuaiah hian ni 125 inhlawhna hi mipuite eizawnna nen inkungkaih tlat niin Department dangte nen tangkawpin changtlung zawk eizawnna duang tura hmalakna kalpui mek a nih thu a sawi bawk.
He hunah hian RD&AD Add. Secretary V Lalengmawia'n powerpoint presentation hmangin VB-G RAM G chungchang report pein India ram puma MGNREGA hman thin chu kum 20 chuang hman a nih hnuah India ram a thingtlang khua te chu kum 20 hma lama kan mamawh thin te lo danglamin chumi mil tur chuan VB-G RAM G hi duan a nih thu a sawi a. MGNREGA hnuaiah Mizoram mipuite kan thawk tha a, kum 2011-a Poverty level 23% ni kha kum 2026-ah chuan 11% ah a tlahniam tih sawiin, heng hmasawnna te hi VC-te, RD&AD a thawktute leh mipuite thawhhona avang a ni tih a sawi a. VB- G RAM G hnuaiah central sawrkar atangin cheng vbc. 611.65 leh Mizoram sawrkar atangin cheng vbc. 67.95 dah a nih thu a sawi bawk.